Kèk jou aprè lanmò chèf gang Belekou a, Isca Andris gwo tansyon eklate nan zòn Site Solèy, Divivye, Fontèn, Sat,Tè nwa, Blancha, Kafou Vensan, Aral, Chemaly ak zòn ki sou kote yo. selon temwanyaj plizyè sitwayen ki abite nan zòn sa yo, depi lè gè sa yo eklate lendi 13 novanm 2023 a, gen plizyè moun ki rive pèdi lavi yo san konte sila yo endividi ak zam pase anba flanm dife.
“Gen moun ki mouri yo boule kadav yo e gen gwo seremoni ki te fèt madi a devan je tout moun nan yon kafou ki rele Kafou Kontab, kote gen 2 tèt moun ki se yon fi ak yon gason, yo plante nan poto ki nan kafou a“, daprè sa yon sous nou ka fè konfyans fè nou konnen.
Nan lide pou chache konprann si lanmò Isca Andris ta pouse gwoup ame sa yo ap goumen nan zòn plèn nan ak nan Site Solèy la, abitan sa presize pou nou premyeman se pa 2 gwoup gang sèlman ki nan afwontman sa ki gen la. Se rezon sa ki fè li eksplike, li parèt difisil pou ta konnen ki rezon ki kache tout bon vre dèyè gè sa yo ki eklate depi lendi aprèmidi nan zòn sa yo.
“Se 2 gè ki genyen nan plèn nan. Lendi ak madi ki sot pase la, se te gè ant nèg tè nwa yo avèk Chen mechan yo paske yo divize. Poutan, sòti ayè mèkredi a pou rive tout jodi jedi a, se nèg ti Gabriel yo avèk Martial ki ap goumen pou teritwa sa ki toujou mete moun ki rete Sat yo an danje”, toujou daprè eksplikasyon abitan sa ban nou pandan l di nou tou anpil moun ki rive chape poul yo nan moman an se nan raje yo pase.
“Fanmi m yo te resi ka deplase se ayè mèkredi a, men depi lendi yo pa t ka sòti se anba kabann yo te ye paske te gen anpil tire, mwen te sòti menm antre m pa t ka antre lakay mwen“, daprè temwanyaj yon lòt abitan ki li menm ak tout fanmi l avan gè a te rete egzakteman nan zòn Sat.
“M pa t antre nan zòn nan ditou, de jou an bagay yo ap pi rèd, gen anpil moun ki mouri, nèg yo boule kay“, se sa divès lòt moun ki te rete nan zòn Blancha temwanye toujou nan menm kad dosye sila.
Pou kounya, sitiyasyon an pa chanje toujou gen anpil tire nan zòn yo, men daprè kèk temwen malgre anyen pa fonksyone pandan semèn nan, e malgre enkyetid popilasyon an gen moun ki fè konprann yo pap kite zòn yo.
Pandantan sa, daprè konsta nou rive fè nan plizyè ponp sòti Dèlma pase pran Nazon ak zòn ki pi lwen yo gentan gen rasanblay sa ki anpeche yon chofè fè gaz byen fasil. Yon sitiyasyon ki ka mennen peyi a sou wout pou l fè fas kare ak yon lòt ratman gaz puiske pandan 2 dènye jou sa yo pa gen okenn kamyon sitèn gaz ki al plen, ni pa gen youn nan yo ki sòti ak gaz nan Tèminal Vare a, selon dènye enfòmasyon ki pataje sou kont X(Twitter)Tèminal la.
© Tous droits réservés – Groupe Média MAGHAITI 2022
