Aprè yon (1) lane depi yon tranbleman tè te pase An Ayiti nan dat 14 Dawout 2021, kote plizyè depatman, tankou Sid, Grandans, Nip, elatriye te rive touche, jodi madi 16 dawout 2022 a, gouvènman Ariel Henry te fè yon konferans pou laprès pou li anonse plizyè aksyon ki pral mennen pou akonpanye viktim sa yo.
Selon Minis afè sosyal ak travay Odney Pierre Ricot : ” Benefisyè nan sant komin sa yo gen yon akonpayman 100 dola ameriken sou yon peryòd 3 sik transfè, genyen komin Il kayimit ak Pestèl ki gentan resevwa 2 sik transfè yo, poutan komin Koray pral resevwa premye sik li yo apati bout mwa dawout la. Men, rès 4 komin yo pral kouvri nan mitan septanm lan, paske te vle kolekte enfòmasyon benefisyè yo anvan, sa nou rele transfè prelèvman prekòs”.
Kondisyon lavi sila yo ki te viktim tranbleman tè 7.2 manitid la pa chanje, anplis lavi chè, kriz gaz epi ensekirite pa sispann mete apse sou klou yo. Pandanstan, gouvènman Ariel Henry an kontinye ap pwomèt moun yo.
Toujou selon Minis afè sosyal ak Travay la : ” Paralèman ak sit transfè sa yo gen yon filyè pwoteksyon sosyal ki chita patikilyeman nan nivo depatman Grandans, 17750 fanmi chak mwa sou yon peryòd 24 sik nan yon transfè pral jwenn 29 dola ameriken, avèk lòt mezi akonpayman epi respsabilite timoun ki nan maniltrisyon, patikilyèman pou yo pa tonbe ladan li ankò. Se poutèt sa nou asosye n ak 2 lòt Ministè ki se Agrikilti ak Sante piblik “.
Plis pase yon lane sila ki nan Sid ak Nip epi Grandans lage 2 bwa balanse aprè tranbleman tè 14 dawout 2021, kote moun sa yo te vin tounen yon veritab sinistre, anplis lòt moun ki te kouri kite kay yo Matisan ak Fontamara pou yo t al pran refij yo akoz sitiyasyon ensekirite, kote bandi nan Vilaj Dedye, Gran Ravin ak Tibwa te chwazi batay pou teritwa ak lòt ankò.
Odney Pierre Ricot, Minis afè sosyal ak travay (MAST) te kontinye eksplike :” Nou kontinye travay nan lòt depatman yo atravè sipò patnè nou yo, mwen vle site anbasad Suis ki te penmèt nou fè entèvansyon ak òganize réponse anviwon 20000 lòt benefisyè nan 2 depatman sa yo, efektivman gen entèvansyon ki te fèt nan peryòd tranbleman tè ki te pase a epi genyen k ap kontinye fèt. Kounya n ap òganize nou parapò ak sak rele peryòd rezilyans nan kad mizannèv tikat Politik Sosyal Pwomosyon Pwoteksyon Sosyal (PNPPS) ki pale Pwoteksyon reyaktive sò”.
Nan konferans pou laprès sa Minis Travay Piblik, Rosemond Pradel, te tou pwofite rakonte divès aksyon ki te fèt pandan aprè tranbleman tè 14 dawout 2021, kote enstitisyon li an la pou l jere kesyon enfrastrikti yo ak lòt ankò.
Atik sa se pwopriyete prive ©️ Gwoup Medya MAGHAITI 2022
