Nan yon arete gouvènman repiblik la mete deyò jounen jodi 3 mas 2024 la, li deklare eta ijans sou tout depatman lwès la pandan 3 jou, sa ap kòmanse fèt sòti jodi dimanch la pou l ale bout mèkredi 6 mas k ap vini an. Tout sa yo ap fèt se nan objektif pou retabli lòd ak pran mezi ki apwopriye pou kontwole sitiyasyon panik ki genyen sou peyi a.
Anplis, pouvwa fè konnen kouvrefe sa ap fèt sòti 6è nan aswè pou rive 5è douvan jou pandan 3 jou sila yo. Daprè presizyon yo fè, mezi sa p ap touche fòs lòd yo, ni sèvis ponpye yo, ni machin anbilans, ni moun k ap travay nan koze lasante e menm jounalis ki gen badj ki idantifye li.
Paralèman, yo fè konprann polisye yo resevwa lòd epi gen yon dividal mwayen legal pou yo fè respekte kouvrefe sila. Sa ki fè y ap ka arete tout moun ki pa vle respekte ni obeyi avèk desizyon gouvènman an pran pou pwoteje tèritwa a kont tout zak banditis ki genyen nan dènyè jou sa yo.
N ap raple gouvènman an vin avèk arete sa, se aprè sitiyasyon ensekirite a vin plis ap k ap ravaje peyi a. Sitou avèk liberasyon plizyè prizonye nan 2 prizon yo epi zak vyolans bandi ap fè sou polisye ak sitwayen sivil nan zòn Metwopolitèn nan kote fanmi ak tifi pa epanye anba vyòl y ap fè sou yo nan plizyè lokalite nan peyi a.
Atik sa se pwopriyete prive ©️ Gwoup Medya MAGHAITI 2024
