Anbasad amerikèn nan peyi Dayiti deside òganize yon vòl chatè pou kèk sitwayen li yo ki posede yon paspò valid jounen dimanch 17 mas 2024 la. Desizyon sa pran se nan lide pou yo kapab kite peyi a parapò avèk zak banditis k ap ravaje a, selon sa anbasad la rapòte.
“Sèl sitwayen ameriken ki posede yon paspò ameriken valid ki pral elijib pou vòl sila“, daprè presizyon anbasad la atravè dokiman li mete deyò a sou dosye sa a.
Sila yo ki ranpli kondisyon yo kapab ranpli fòm admisyon sa atravè adrès elektwonik sa : https ://mytravel.state.gov/s/crisis-intake.
Yo fè konnen vòl sa ap fèt nan ayewopò ki nan vil Okap la, konsa yo rekòmande tout sitwayen ameriken ki kapab travèse rejwenn yo nan ayewopò sa pou tout sekirite. Responsab anbasad la raple vwa terès pou sòti Pòtoprens pou rive Okap la vrèman danje, se sa k fè yo mande pou moun yo veye kò yo toujou selon nòt sila. Pou sa k konsène avyon an, yo fè konnen gen 166 plas ki disponib nan aparèy la.
N ap raple, jouskaprezan Ayewopò Entènasyonal Toussaint Louverture a toujou fèmen depi aprè atak bandi yo te fè sou li, kote kèk avyon te resevwa bal. Sou yon lòt bò, anbasad amerikèn te gentan voye plizyè sòlda nan peyi a nan jou pase yo pou pwoteje batiman yo a epi deplase avèk diplomat li yo ak pèsonèl travay li yo.
Atik sa se pwopriyete prive ©️ Gwoup Medya MAGHAITI 2024
