Nan yon rapò Global Kont Krim Òganize Transnasyonal(GI-TOC) pibliye jou ki te 13 fevriye 2024 la, yo fè konnen gang yo gen pwòp klinik yo pou fè trafik ògan moun nan peyi a. Ekspè yo ki ekri rapò sa, soulinye gen divès ka ki moutre a klè gang yo lage nan trafike ògan ayisyen yo konn kidnape oubyen moun yo konn touye yo.
“Kèk gang espesyalman nan Site Solèy ak Kanaran lage yo kounya nan trafik ògan. Menmsi sijè sa mande pou n fouye plis sou li toujou, men gen kèk temwen nan zòn yo ki di nou menm gen ka kote gen plizyè kadav ki manke ògan ki lage nan wout yo”, daprè sa ki di nan rapò sa ekspè Romain Le-Cour-Grandmaison, Ana Paula Oliveira, ak ekri.
Pi lwen toujou, yo fè konnen gen kèk lopital ki menm konfime aksyon sa yo pa rapò ak divès ka yo konnen, keseswa nan Pòtoprens la oubyen nan zòn pwovens yo kote gang yo kidnape moun. Yon lòt kote, yo mete aksan tou sou endividi sa yo ki ta gen pwòp klinik yo pou retire ògan moun.
“Gen gang ki opere nan pwòp klinik yo, e se pa sèlman pou pran swen sòlda yo, men tou se pou retire ògan moun yo pran yo“, toujou daprè sa ki di nan rapò sila.
Anplis trafik ògan kèk gang kòmanse fè jounen jodi a, rapò a fè konnen tou pou kounya gen yon gwo evolisyon sou plan ekonomik ak teritwa ki fèt nan bò prezime bandi yo. Nan yon bò yo rapòte, endividi ak zam yo fòse antrepriz yo bay 20 000 dola ameriken chak semèn, e fè konprann yo gen yon pousantaj sou chak konntenè antrepriz yo konn antre ak yo e yo konn menm fè librezon zam pou yo tou.
Yon lòt kote avèk divès pwen kontwòl gang yo mete toupatou nan peyi an pou fè resèt, yo fè kwè endividi ak zam yo rive ranmase ant 6 000 ak 8 000 dola us pa jou, kote yo menm bay kat pou yo touche pi rapid. Poutan, pou sèlman kidnapin nan anketè yo ki nan peyi Lasuis estime gang yo ranmase anviwon 25 000 milyon dola chak ane
Atik sa se pwopriyete prive ©️ Gwoup Medya MAGHAITI 2024
