Nan kad òdonans li ki pibliye jodi lendi 19 fevriye 2024 la, sou lanmò ansyen prezidan Jovenel Moïse la, jij Walter Wesser Voltaire deside mande pou lajistis pousuiv 51 moun pami yo Martine Moïse, Claude Joseph ak lòt ankò. Pandantan sa, li te tou profite retire non kèk moun pami sila yo li te tande nan dosye sa.
Nan tout non ki te site nan lanmò ansyen prezidan an, jij Voltaire mande pou lajistis ayisyèn pousuiv 51 moun li rive jwenn chaj kont yo. Konsa, sou lòd jij la, moun sa yo ap gen pou al jije douvan tribinal kriminèl san jiri, avèk divès akizasyon k ap peze sou do yo tankou asosiyasyon malfektè, vòl ak zam nan men, teyoris, ansasinay ak konplisite ansasinay, yon krim ki fèt sou prezidan Jovenel Moïse.
Pami moun sa yo nou jwenn: ansyen premye dam Marie Etienne Martine Moïse, Dimitri Herard, Léon Charles, Claude Joseph, Christian Emmanuel Sanon, Joseph Félix Badio, Joseph Vincent, James Solage, Victor Albeiro Pineda Cardona, Jeantel Joseph, Alejandro Giraldo Zapata, Manuel Antonio Groso Guarin, Jhon Jairo Ramirez GOMEZ, Jhon Jader Andela, Neil Caceres Duran, Francisco Eladio Uribe OChoa, Alex Miyer Peña elatriye.
Sepandan jij enstriksyon an te rive retire kèk non moun tou nan dosye a, se ka pa ansyen palmantè Antonio Cheramy, Reynaldo Corvington, Dominick Cauvin, Paul Eddy Amazan, Renor Fontus, Pierre Osman Léandre, Prevot Mozart, Conrad Bastien. Majistra a fè konnen rezon ki lakòz li pa enplike moun sa yo, se dèske li pa jwenn tout endis, e pa menm jwenn menm chaj ki pou ta jistifye enplikasyon moun yo nan lanmò sa yo te site non yo ladan l la, daprè sa ki ekri nan òdonans 122 paj jij la ekri a.
Toujou nan menm dosye sa, jij Voltaire anonse tout pousuit ki te gen kont Marie Jude Gilbert Dragon, Mauricio Javier Romero Medina, Duberney Capador Giraldor, Miguel Guillermo Garcon ak Joseph Gérald BATAILLE, anile akòz moun sa yo lajistis te rive konstate epi sètifye yo mouri.
Paralèlman, majistra a òdone tou pou mete yon bout ak pousuit penal yo te tanmen kont
John Joël Joseph, James Solage, Joseph Vincent, Roodolph Jaar, Angel Pretel Ortiz, Mario Antonio Palacios, Walter VEINTEMILLA, Antonio INTRIAGO, German Alejandro Rivera GARCIA alyas kolonèl Mike. Daprè eksplikasyon ki bay nan dokiman an, desizyon sa ta pran se pa rapò ak prinsip «non bis in idem» la ki vle di yo paka pousuiv yon moun oubyen pini l pou menm kòz yo.
“Si yo pot ko nan prizon, nou òdone pou yo mache pran moun sa yo al mete nan prizon sivil Pòtoprens. Nou òdone tou, pou tout pòt kay prezidan an rete anba sele. Boutofen, nou mande pou tout pyès pwosedi a transfere pou al jwenn komisè gouvènman an pou tout suit ki dwe fèt yo“, selon òdonans final jij enstriksyon Walter Wesser Voltaire ki jwenn èd grefye Éric H.Simmonds.
Atik sa se pwopriyete prive ©️ Gwoup Medya MAGHAITI 2024
