Dimanch 28 avril 2024 ki sot pase a, direktris Fon Monetè Entènasyonal la (FMI), Kristalina Géorgieva, nan yon panèl ekonomik nan vil Riyad, mande pou peyi ki pòv yo fè jefò pou yo ka resevwa soutyen ekonomik nan men peyi rich yo. Sitou nan sa k gen pou wè ak restriktirasyon dèt yo, sa k ap penmèt yo kouvri bezwen finansye yo, selon sa a jounal Listin Diario rapòte.
« Peyi pòv yo dwe kolekte enpo yo, lite kont kòripsyon, amelyore kalite depans yo epi montre angajman yo parapò ak popilasyon yo», sa a se deklarasyon responsab FMI an, nan panèl espesyal sa a.
Fòk nou mete n dakò, jounen jodi a nou dwe rekonèt n ap viv ansanm nan menm bato, okenn peyi rich pa ka di peyi pòv yo kite bato a, osnon nou tout ap koule ansanm.
« N ap raple ekonomi mondyal la nan dènyè ane sa yo, FMI amelyore ak reyisi kòm pwojeksyon kwasans 3.2% pou 2024 la, prensipalman gras ak bon pèfòmans ekonomik yon ansanm peyi tankou Etazini ak Lachin.» se sa a direktris la ajoute.
Yon lòt bò, minis finans peyi Arabi Sawoudit la, Mohamed Al-Jadaan, avèti sou panel sa a, defi jewopolitik mond lan ap konfwonte jounen jodi a tankou gè ant Izrayèl ak Palestin nan espas Gaza a, se yon gwo risk k ap gen gwo enpak sou ekonomi mondyal la.
« Tansyon jewopolitik yo ap trennen enpak dirèk sou ekonomi mondyal la, kòm fragmantasyon, pwoteksyonis oubyen itilizasyon ak limit resous yo epi menm sèvis teknoloji a», se sa a minis finans Arabi Sawoudit la sinyale.
N ap raple, nan dat ki te 21 desanm 2023 a, Fon Monetè Entènasyonal (FMI) te apwouve yon pwolonjman jiska 30 septanm 2024, yon pwogram referans an favè Ayiti. Peyi D Ayiti dwe jwenn yon sipò makwo ekonomik puiske l ap afwonte yon moman difisil ak yon kriz imanitè grav.
Atik sa se pwopriyete prive © Gwoup Medya MAGHAITI 2024
