3 moun rive pèdi lavi yo yè dimanch 28 avril 2024 la, aprè yon miray te rive tonbe sou yon kay nan zòn Ri Lopital nan Pòdepè. Selon SOS Haïti-Météo, lanmò moun sa yo se akòz gwo lapli ki pa sispann tonbe sou premye vil depatman Nòdwès la.
“Se yon ensidan ki pase yè nan 6è, pami nou 4 ki te kouche anndan an se mwen menm sè l ki rive sove”, se deklarasyon sa Sherley Lebrun ki se youn nan moun ki te twouve l anba dekonm yo fè nan mikwo Haiti9 News jodi lendi 29 avril 2024 la. Yon lòt kote, ajan pwoteksyon sivil ki te la a bay yon premye bilan ki fè konnen 3 moun ki mouri yo se yon timoun 5 lane, yon jèn fanm ansent ak mèt kay kote ki kraze a.
Menm jan divès imaj k ap pataje sou rezo sosyo yo montre l, ajan pwoteksyon sivil ki te sou plas la, Augustin Elie fè kwè aksyon sila a rive pase se akòz move tan ki gen sou vil la depi kèk jou. “Se yon bout mi ki te pa anlè, epi akòz lapli a k ap tonbe miray la vin twò lou pou tè a, li glise epi li tonbe sou kay la”, daprè eksplikasyon reprezantan pwoteksyon sivil nan depatman an bay.
Se pou sa, Augustin te tou pwofite voye yon mesaj bay responsab lameri yo, ak sitwayen yo yon fason pou raple yo se pa tout kote moun kapab konstui kay pou yo rete. Se nan sans sa tou, li di l regrèt lanmò 3 viktim yo, pandan l swete pou pa gen lòt ka konsa ankò puiske li soulinye nan dat ki te 20 desanm 2015 la, yo te anrejistre 8 moun ki te mouri nan menm sikonstans la nan zòn mòn Dorima.
Atik sa se pwopriyete prive © Gwoup Medya MAGHAITI 2024
