Pap François ankouraje konsèy prezidansyèl la yè dimanch 28 avril 2024 la, pou l travay pou lapè ak estabilite nan peyi a nan moman li t ap selebre mès nan peyi Itali, presizeman «Venise», selon sa a jounal Listin Diario rapòte.
« Nou vle envoke ak entèsede devan manman Mari pou tout soufrans mond lan. M panse Ayiti, nan Eta ijans puiske popilasyon an nan eta dezespere akoz sistèm sante a tonbe nèt, difikilte pou yo manje ansanm ak vyolans k ap fè moun yo kouri», se deklarasyon sa a Pap François bay nan mès la. Li menm kontinye pou li ajoute : « Nou konfye Senyè a travay ak desizyon Konsèy prezidansyèl tranzisyon an ak soutyen kominote entènasyonal la, li pral kapab mennen peyi a ki dezespere a sou wout lapè ak estabilite.»
Konsèy Prezidansyèl Tranzisyon an ki te enstale jedi 25 avril la gen misyon pou l vin òganize eleksyon epi estabilize peyi a. N ap raple, peyi a ap konnen yon vyolans tèt chaje depi mwa fevriye kote plizyè enstitisyon prive ak piblik sibi dechoukay epi genyen yo mete dife ladan yo.
Plis pase 360 000 moun oblije kite lakay yo pou yo ale refijye yo nan Gran Sid (Grandans, Sid, Sidès, Nip) la, sou kèk plas piblik epi lekòl nan zòn Pòtoprens lan akoz zak bandi “viv ansanm” nan peyi a.
Atik sa se pwopriyete prive © Gwoup Medya MAGHAITI 2024
