Òganizasyon Eta Ameriken (OEA) mande pou chwa premye minis la fèt nan transparans epi respè règ yo. Tandiske, li salye chwa Edgar Leblanc fils kòm prezidan konsèy la, selon piblikasyon sou kont X sekretè Jeneral OEA a, Luis Almagro.
« Nou felisite nominasyon jounen jodi a prezidan konsèy prezidansyèl la, se yon etap difisil ki franchi nan akò politik nasyonal Ayiti a. Chwa premye minis la dwe fèt nan transparans ak respè règ, epi fòme byen rapid yon nouvo gouvènman pou peyi a ka jwenn estabilite li», daprè sa sekretè jeneral Òganizasyon Eta Ameriken an, Luis Almagro ekri. Li di sa, se pa rapò ak chwa ki te fèt ayè 30 avril 2024 la, nan Konsèy Prezidansyèl Tranzisyon an.
Anplis, sekretè jeneral ekstrikti sa fè konnen desizyon sa se yon pa k ap pèmèt deplwaman misyon miltinasyonal la fèt nan rejyon Karayib la. Yon moman kote Ayiti ap konnen yon enstabilite politik ak ensekirite : « Li esansyèl pou n kanpe dèyè pa sa, soutni deplwaman misyon miltinasyonal k ap vin sipòte Ayiti a parapò avèk desizyon konsèy sekirite Nasyonzini an epi louvri yon bon wout pou òganize eleksyon demokratik an Ayiti», soulinye Luis Almagro sou kont X li.
Pou fini, n ap raple divès estrikti nan lavi politik peyi a konteste chwa premye minis Fritz Bélizaire, ki fèt selon desizyon blòk majoritè konsèy prezidansyèl la kidonk nan fason inilateral. Biwo Suivi Akò Montana (BSA) mande pou blòk majoritè a respekte Akò 3 avril 2024 la, ki te siyen ansanm avèk manm konsèy la.
Atik sa se pwopriyete prive © Gwoup Medya MAGHAITI 2024
