Nan yon konferans pou laprès jodi samdi 4 me 2024 la, responsab yo nan prizon sivil Pòdpè a fè konnen gen 4 prizonye ki mouri epi 8 lòt sove kite prizon an nan zak ki fèt nan lannuit vandredi 3 me a. Selon sa yo fè konprann, sove kite prizon an se te yon plan endividi yo te byen planifye.
“Genyen 8 nan prizonye sa yo ki gentan sove, genyen 4 nan prizonye nan yo ki mouri. Angwo gen 25 ki rete nan selil la”, daprè sa pòt pawòl lapolis Nòdwès la, enspektè Joseph Léonel deklare tousuit aprè konsta jij Mentor Stephen maten an. Yo soulinye tou, se egzakteman nan selil 2 a, ki te gen 37 endividi, zak sila pase.
Mete sou sa, yo fè konprann gen yon polisye ki sòti blese aprè youn nan prizonye yo te atake l ak yon pik yo te rive fè ak men yo. Yon lòt kote, reprezantan lapolis la te pwofite demanti enfòmasyon ki t ap plede pataje pou te fè kwè se bandi ki te atake prizon an. Enspektè Joseph soulinye, se pito prizonye anndan selil 2 a ki te mete tèt yo ansanm pou te planifye evazyon sila.
Pou kounya, menm jan komisè gouvènman Pòdepè an, Jéir Pierre te fè kwè lapolis te tanmen operasyon pou rejwenn prizonye sa yo, se menm jan an tou PNH la anonse gen gwo dispozisyon ki pran nan tout vil la pou jwenn 8 endividi sa yo.
“Pierre Djosny ki te kondane pou 8 an prizon, Alexène Joseph te kondane pou tout lavi l, Garçon Biwendy, Jean Patrick ki te arete pou kidnapin epi ki te kondane pou 12 lane nan lari a kounya, Johnny Alexandre, Herns Wilnaire”, se non sila yo komisè Pierre di ki chape poul yo, alòske Jean Edondo alyas 3 milyon, Paul Jean Garry, Leslie Alexie, Saintilmé Jimmy se non sila yo ki jwenn lanmò yo a.
Atik sa se pwopriyete prive © Gwoup Medya MAGHAITI 2024
