Pòtoprens, jou dimanch 3 septanm 2023 a._ Jou aprè jou sitiyasyon peyi Dayiti ap vin pi konplike. Chak semèn ki pase gen yon nouvo katye ki tonbe sou kontwòl bandi ak gwo zam manch long. Pèsòn paka konprann pwojè nèg ak zam sa yo ni konnen objektif yo gen pou peyi a, sof sa ki parèt klè kou dlo kòk se: menm jan popilasyon an ap konstate dega yo, se menm jan an tou moun ki di tèt yo se yo ki chèf yo ap konstate tou.
3 semèn ki sot pase la yo se te kou pa zòn Kafoufèy ki tonbe anba kontwòl gang Gran Ravin nan ki gen nan tèt li yon sèten Ti Lapli, Kilik ak Bougòy. Popilasyon Kafoufèy oblije vole gagè tankou sourit ki pantan sou chat. Viktim yo pa menm gentan sove byen materyèl yo pandan atak bandi yo, gen kèk grenn ki gentan sove sèlman kèk dokiman enpòtan tankou batistè, paspò ak papye bakaloreya. Moun yo oblije pran daso nan kèk lekòl ak plas piblik pou yo pran yon ti poz annatandan yo jwen yon solisyon.
Okenn òganizasyon paka di konbyen moun ki mouri nan atak sa k ap fèt Kafoufèy la. Sof sa nou ka wè se degre atak la ak gwo panik ki pandje sou zòn sa gras ak kèk videyo k ap sikile sou rezo sosyal yo. Nou wè tou, anpil kay k ap boule pandan evenman sa, temwen yo di se kay polisye bandi yo ap mache kankannen konsa. Nou wè nan videyo yo anviron plis pase 50 nèg ak zam k ap defile nan zòn sa kè pòpòz. Non! Bagay la tris, bagay la grav!
Pa gen koze al danse bann rara “Foula” ankò, osnon al achte yon bon fritay nan Relax, oubyen al pran bon plezi rap nan BPC. Kafoufèy tonbe plat epi bandi yo bay moun nan lòt katye ki kole ak Kafoufèy yo yon iltimatòm kèk jou pou yo demaske yo nan blòk la.
Kounye a, sa pral pi fasil pou bandi Gran Ravin ak Vilaj Dedye fè kidnapin aprè pou yo pase byen vag nan Kafoufèy pou tonbe dirèk nan baz yo. Epi gras ak nouvo teritwa sa yo pran nan men Baz Pilat la, yo vin gen aksè ak zòn tankou Tijo ak Kanapevè ki yo menm te kòmanse mouvman Bw* Kale a. Nou rete kwè bandi yo pral tire vanjans yo.
Sa ki etone tout moun pandan masak sa a, se dèske dirijan yo pa leve ti dwèt yo pou ta pote sekou ak popilasyon an ki nan detrès. Ariel Henry ki se premye minis poupetwèl gouvènman defakto a epi chèf CSPN a, chita byen vag sou chèz boure li ap gade peyi a k ap depafini san li pa pran okenn desizyon. Li pa dekrete ni eta dijans, ni kouvrefe, ni pran okenn lòt gwo desizyon pou ta eseye reprann kontwòl peyi a. Okontwè, kòm gwo dirijan nen frèt se dokiman l ap siyen pou gouvènman meriken depòte konpatriyòt nou yo an Ayiti. Li pa gen okenn manda, ni misyon, ni dat pou l bat zèl li sou pouvwa a. Ariel plis sanble yon pinisyon loksidan enpoze nou, kote pèp la asepte santans li san plenyen!
Emmelie Prophète li menm nan bò pa l, anpil moun toujou ap vann nou kòm gwo entelektyèl aji pi mal pase yon moun ki pat janm chita sou yon ban lekòl. Li se minis enteryè epi minis lakilti nan gouvènman sankoutcha sa, sa vle di se dezyèm moun ki gen plis pouvwa nan mitan dirijan sanginè sa yo. Pou nou, madanm Prophète se youn nan pi gwo bouwo ki kanpe anfas pèp la pou kounye a, depi ou pa gen ase bon sans pou w konstate zak ou ak konplisite ou k ap fè moun soufri, depi ou pa gen konpasyon ak lanmou pou peyi w… ou se entèlektyèl pachiman, ti figi san santiman.
Aprè masak ki te fèt nan kanaran an wikenn ki sot pase la, kote preske yon ventèn fidèl pastè Marco pèdi lavi yo, kòman pou nou konprann direktè jeneral lapolis la, Frantz Elbé deklare PNH la te fè tout sa l kapab pou anpeche moun yo al goumen ak bandi yo? Se DG a menm ki te di mach la te gen plizyè branch kote polisye yo pat ka jere tout moun yo. Nan tout peyi serye Frantz Elbé te sipoze depoze lèt demisyone l tousuit aprè masak sa, pou enkapasite l pou te rive pran yon bon desizyon ki t ap evite san sa yo koule.
Men domaj an Ayiti dirijan yo pa respekte okenn prensip, mesyedam yo kanpe an nen frèt epi yo bouche zorèy yo, yo fèmen je epi zipe bouch yo nan koze pèp la. Moun sa yo paka dirije, yo pa gen ni talan, ni visyon ak bon konprann pou yo jere yon peyi. Nou dwe rele moun sa yo ti dirijan poupetwèl, meli melo.
Kòman pou nou konprann yon peyi ki tèt anba konsa pou leta ayisyen ap dwe yon pwomosyon nan lapolis la 3 mwa? Kisa ou voye mesyedam sa yo fè? Yo gen zam nan men yo, bouch yo fann e fòk yo manje. Tout mouvman popilè k ap fèt pou delivre peyi a ta sipoze kont moun sa yo avan, aprè pou nou konsantre nou sou sanzave pye blanch yo ki pran katye nou yo an otaj.
Atik sa se pwopriyete prive ©️ Gwoup Medya MAGHAITI 2023
