Alòske responsab polisyè nan peyi a fè kwè Lapolis lanse divès operasyon nan tout peyi a pou kwape bandi, nan depatman Latibonit bandi yo rive kidnape nan wikenn ki sot pase a plis pase 30 moun yon sèl kou. Selon enfòmasyon medya lokal yo bay, viktim yo te nan plizyè kamyonèt ki chaje pou fè zòn Lyankou ak Ponsonde.
Aprè zak kidnapin sa ki fèt sou plis pase 30 sitwayen nan zòn latibonit la, plizyè moun nan popilasyon an pa kache kolè yo kote yo mande pou PNH la pran responsabilite l ak pran tout dispozisyon nesesè pou konbat gwoup gang sa. Pandantan sa, nouvo direktè depatmantal latibonit la, Paul Ménard li menm te deklare 23 dawout 2023 a, se nan kolaborasyon lapolis ak popilasyon an fòs lòd yo ap ka kwape tout bon vre bandi yo.
“M te di popilasyon Grandans la ensikirite a si yo vle l l ap enstale, si yo pa vle l volonte lapolis la ak volonte direktè depatmantal la l ap mete sou pa yo a pou n ka kanpe fas ak ensekirite a, se menm pawòl sa yo tou m ap di nou” se deklarasyon sa nouvo direktè a te fè nan seremoni enstalasyon l 23 dawout pase a.
N ap raple nan rapò Biwo Entegre Nazyonzini te sòti vandredi pase a yo te soulinye sou 298 ka kidnapin ki fèt sòti avril rive mwa jen an, depatman Latibonit pou kont pa l anrejistre 48% nan ka sa yo. Daprè detay yo, se menm tip kidnapin kolektif sa gang Savyen an toujou itilize sou moun Lyankou, Ti rivyè latibonit, Lestè ak zòn sou kote yo.
Atik sa se pwopriyete prive ©️ Gwoup Medya MAGHAITI 2023
