Pòtoprens jou ki te 21 dawout 2022 ._ Yè Samdi a popilasyon an te leve sou gwo chòk aprè li te fin aprann nouvèl masak ki fèt sou anviwon 6 moun, pami yo 2 sè ak manman yo kite nan menm machin. Dram sa te pase nan yon lokalite ki rele Site Doudoun, nan komin Kwadèboukè.
Selon plizyè sous ki te rapòte nouvèl la, te gen 5 pasaje nan yon machin ”Suzuki Grand Vitara” ki ta pral vakye ak okipasyon yo, konsa yo ta pral kontre bab pou baba ak yon bann bandi ak gwo zam lagè ki t ap opere sou wout la. Toujou daprè sous sa yo nou ka site medya « Vantbèf info » ak « Le Facteur », chofè machin lan te eseye fè kèk kout volan pou evite sanzave yo, ki ta pral ouvè kout zam sou yo epi touye tout moun nan machin lan. Bandi yo pa t kontante masakre viktim yo sèlman, yo te menm rive boule machin lan ak tout kadav yo.
Pami moun ki viktim nan masak sa nou ka site Sarhadjie Desanclos, Sondjie Sherwood Desanclos ki se 2 sè epi manman yo ki se Josette Fils. Imaj yo tèrib, lè w ap gade foto ak videyo sitwayen sa yo k ap kankannen nan flanm dife ou paka pa kriye depi w se moun. Ou paka pa revòlte depi w se yon moun ki gen konsyans ak bon konprann. Lè w ap gade videyo medam yo ki t ap danse sou rezo sosyal yo nan vivan, ak kèk foto lè yo t ap sèvi manm dakèy nan legliz yo te mache, ak foto gradiyasyon yo. Figi medam yo te make lespwa malgre yo tap eseye viv nan yon peyi kote kondisyon yo difisil anpil, souri yo malgre laperèz te pwouve anvi viv men, sanzatann yo t al tonbe sou yon dividal atoufè san fwa ni lwa ki fèmen liv lavi yo.
Kisa yon moun pral di kounya ak papa timoun sa yo pou konsole li? Kisa ki ka anpeche avoka sa pran zam ak kèk lòt sivil pou vanje fanmi li? Kijan sitwayen sa yo pral santi li lè li tonbe sou mesaj blogè Windy Phele ki di manman an t ap travay APN ki gen rapò ak konntennè zam ilegal k ap antre nan peyi a?
Yon dosye trajik konsa pou moun ap eseye politize li, nou fè tout sa nou konnen pou nou defann enterè klan nou, men an reyalite nou pa ta sipoze ap krache sou kadav viktim sa yo.
Li klè travay lapolis la kòmanse ap bay rezilta, paske anpil bandi nan mawon, li ta menm sanble lanmò 100 jou ki te baze nan komin kwadèboukè nan kanpe lwen epi Babekyou anba dèlma manke bwè dlo bouch li menm jan ak ansyen fo grimo ki te rele Kòlèg la, bon pye sanginè a te sove l aprè l te fin rankontre ak yon cha blennde. Epi tank yo lach, “kanpe goumen li ye” epi lè batay la pete y ap kraze rak tankou manman poul ki paka kenbe chalè kòk nan poulaye.
Bandi yo nan laperèz, yo nan kouri paske lapolis la ak lame Dayiti kòmanse mete pye yo atè nan tout baz ak nan tout depatman. Men, nou poko jwenn rezilta n ap chache a, lè lapolis fin kraze yon baz yo dwe asire yo rete nan zòn lan pou sanzave ki ki te chape yo pa vin tire vanjans sou popilasyon an, sinon se ap lave men siye atè. Lè nou fin touye oubyen arete yon chèf bandi, moun ki nimewo 2 nan gang lan ap twò kontan pran plas li. Nou dwe rete nan zòn wouj yo pou nou ekstèmine vèmin yo jis nan rasin yo.
Popilasyon an dwe konprann tou lapolis paka fè travay sa pou kont li. Pi piti pase 15 000 polisye ak kèk santèn sòlda paka derasinen bandi pou kont yo, nou bezwen kout men tout moun pou nou reyisi. Pa bliye nan mitan 2 enstitisyon nou sot site la yo plen ajanten, sa vle di polisye ak sòlda ki nan mare sosis yo ak bandi epi sèvi antèn pou yo. Se sak fè nou tout ki nan katye yo dwe sèvi enfòmatè pou lapolis tou, menm si se an lach. Sa vle di si w pa vle pran nan cho, si w pa vle moun dekouvri idantite w ak bay kout dwèt ankachèt nan medya yo epi sou rezo sosyal yo.
Pou tout moun sou rezo sosyal yo k ap di si Jovenel Moïse te la bagay yo pa t ap konsa, kòmkwa se pa Jovenel ki bay peyi a kou final la. Yo bliye si se rejim Tèt Kale 2 zyèm vèsyon an ki kraze tout enstitisyon kontwòl yo pou patizan yo ka naje nan koripsyon. Si Jovenel te fè eleksyon jan konstitisyon an te mande a, te ka toujou gen yon palman pou vote gwo lwa tankou peyi Salvadò, kote gouvènman an ap mache sou gang san kanpe ak sipò bon jan tèks lalwa. Menmsi palman nou an se te yon lòt kansè ankò. Sou Jovenel, pouvwa ekzekitif la te manke kraze PNH la an miyèt mòso aprè li te fin pran presyon epi aksepte sendika ki te rele SPNH la. Nèg isit pa chèf, depi w rele sou yo, yo pipi nan pantalon yo.
Ti mesyedam Tèt Kale yo te fin kraze sistèm jistis la nèt, paske yo te pè pou youn nan jij CSPJ yo pa ranplase prezidan defakto a nan yon tantativ koudeta. Rezilta, lè w kraze pouvwa jidisyè a, ou kraze pouvwa lejislatif la, ou afebli lapolis ak enstitisyon kontwòl yo, ou ekspoze tèt ou menm, ou pran nan patannte tou.
Lanmò paka lave peche ansyen prezidan an, kidonk se pozisyon nou sa.
Pou n fini, n ap di popilasyon an desten peyi a se nan men li ye. Nou ka deside viv tankou zonbi epi tann masak pa nou, paske chak grenn ayisyen ap mache ak sèkèy yo anba bra yo oubyen nou ka suiv ekzanp popilasyon latibonit pandan wikenn sa ki te mete ansanm ak lapolis pou decchouke gang nan Savyen.
Boul la nan pye nou se jwe li.
Atik sa se pwopriyete prive ©️ Gwoup Medya MAGHAITI 2022
