Pòtoprens, jou dimanch 27 dawout 2023 a._ Bri kouri nouvèl gaye, bandi Gran Ravin san fwa ni lwa anvayi zòn Kafoufèy ki te sou kontwòl yon lòt gwoup gang ki rele “Baz Pilat”. Nan yon premye tan 2 gang sa yo te fè lapè sa ki pa t dire puiske gè a ta pral eklate ankò yon lane aprè lapolis te mete lapat sou chef gang Baz Pilat la ki rele Ezéchiel Alexandre. Kounya, nan nouvo batay sa, anpil inosan gentan pèdi lavi yo, anpil kay gentan pase anba flanm dife ak tout sa ki te ladan yo san bliye gen anpil moun ki te kankannen ladan yo tou. Aktyèlman pifò zòn nan Kafoufèy blanch kou koton, popilasyon an oblije mete van nan vwè l yo pou yo sove lavi yo.
Imaj k ap sikile sou rezo sosyal yo tris anpil, moun yo al anpile pil sou pil sou plas piblik yo, oubyen sa ki gen fanmi ak zanmi ki abite nan zòn ki poko gen gè, oblije mande yon ti ladesant annatandan yo jwen yon kote pou yo enstale yo. Sa ki pi mal la, nan semèn sa yo lapli pa sispann tonbe, sa ki vle di lapli mouye yo solèy sèche yo sou plas piblik yo, se yon veritab mati pou yo!
Nan tout deblozay sa, gang Baz Pilat la pa leve ti dwèt li pou ta defann moun ki t ap viv sou teritwa yo t ap kontwole yo. Kisa ki ka eksplike mouvman lach sa? Premyèman Ezéchiel Alexandre alyas Ze k ap jui lavi li nan Penitansye Nasyonal, ka fache paske lapolis ak lajistis deside mete li prizon sa ki ka pouse l bay gang Pilat la lòd pou yo pa reyaji. Dezyèmman, bon polisye ki rete nan zòn nan ak sa ki fè pati Baz Pilat di yo p ap batay, se yon fason pou opinyon piblik la pa di se 2 gwoup gang k ap goumen.
Sa nou dwe konprann nan sa k ap pase Kafoufèy la, zòn yo pat janm nan gè vre, se gwoup gang ki toujou ap goumen pou pran plis teritwa nan objektif pou fè politik. Lè gen eleksyon, kandida yo debloke gwo lajan ak zam pou yo gen aksè ak zòn yo epi fè magouy jou vòt la. Tout sa k ap pase nan peyi a se politisyen ak pasivite pèp la ki fè nou rive nan fon labou n ap benyen la.
Mizè fè anpil moun k ap viv nan geto yo visye, sa ki pa dakò kenbe zam menm jan ak bandi yo, sèvi antèn ak resèlè pou yo. Gen lòt ki pa nan anyen ki dwòl men ki pran plezi nan manje lajan kidnapin.
Jodi a nou sezi tande gang Bèlè aksepte fè lapè ak gang Babekyou k ap dirije zòn ba Dèlma, sitou aprè tout masak ansyen polisye sa te fè sou moun Bèlè. Nou sonje byen dokimantè medya ameriken BBC a te fè sou batay sa, kote viktim yo t ap temwanye kijan Babekyou te mete dife sou moun tout vivan, kote yon dam t ap rakonte dife te pran nan tout tèt li… enbyen kounye a menm Babekyou sa k ap danse Raram san kè sote devan legliz Pèpetyèl sou Bèlè. Anpil moun mete men nan bouch tèlman yo sezi, men nou menm kote pa nou, nou te gentan konprann se paske yo tande delegasyon peyi Kenya ta pral antre nan peyi a ki fè yo te kouri fè lapè. Yo antann yo pou yo ka goumen ansanm pi byen.
Bandi mete tèt yo ansanm pou yo kidnape peyi a, se nou menm moun onèt ak patriyòt ki poko jwen yon fòmil pou nou retire vèmin sa yo nan kòlèt nou. N ap sezi wè nan eleksyon ki gen pou fèt yo, se reprezantan bandi bandi sèlman k ap genyen li oubyen moun ki nan move zafè, paske se yo menm ki gen bon bras nan men yo pou yo mobilize foul.
Lòt gwo avantaj ki gen nan sitiyasyon kawo sa, aprè politisyen yo fin simaye lajan ak gwo zam pou fè eleksyon, gang yo pa kanpe la, yo ranfòse tèt yo, yo fè rekritman tankou tout òganizasyon epi yo fè suivi ak evalyasyon pwojè yo. Yo pran endepandans yo pa rapò ak moun ki te kreye yo a epi yo kreye pwòp mwayen yo pou yo kontinye fè lajan.
Kòm egzanp, gang KrisLa nan Tibwa prèske pase 3 lane ap goumen kont gang Gran Ravin nan ak gang Vilaj Dedye a pou kontwole wout Matisan an. KrisLa vin pèdi tout resous li te konn jwen nan men pouvwa Jovenel la, ak nan kèk bwat leta depi aprè lanmò ansyen prezidan an. KrisLa pèdi anpil sòlda sa ki vin lakòz li te oblije fè yon kanpe lwen pou l pa t pèdi ni sak ni krab.
Aprè sa li te vin nan sitiyasyon pou l fè lapè ak Gran Ravin ak Alye li Vilaj Dedye pou yo te pataje resèt Matisan yo.
Pa bliye Matisan se yon pasaj oblije ki konekte depatman Sidès, Sid, Grandans, Nip ak Depatman Lwès la. Gen yon bon pati nan wout Matisan an machin ak moto pa pase paske bandi yo fouye gwo tou nan yon bò nan wout la ki chaje ak dlo sal epi fatra. Kidonk, tout bis k ap pase pa gen chwa se peye gang Gran Ravin – Vilaj Dedye a 10 000 goud kòm kontribisyon pou yo sikile, epi bay 5 000 goud pou gang KrisLa. Si w ap pase ak machandiz oubyen w ap demenaje, sa se yon negosyasyon apa. Sa vle di, yon sèl bis dwe bay 15 000 goud pou pase ak pasaje Matisan, an nou di ta gen 150 bis ki pase pou yon jounen, y ap fè yon resèt k ap bay 2 250 000 goud.
Kidonk kontwòl zòn yo enpòtan anpil pou gang yo san nou pa bliye pale koze kidnapin nan ki fè gang 400 Mawozo a milyonè yo menm. Nou ka wè Lanmò 100 jou ak sòlda li yo pa bat kò yo twòp ankò nan kwadèboukè depi aprè yo te fin touche lajan misyonè ameriken yo. Y ap jui lajan yo!
Pou dosye Pastè Marco kite òganize yon mouvman mache pran bandi nan zòn Kanaran jou samdi 26 dawout 2023 a, kote plis pase 10 fidèl pèdi lavi yo anba bal, n ap di se paske pa gen leta ni pa gen dirijan nan peyi a. Yon pastè ki kanpe sou entènèt la ki anonse li pral dechouke bandi ak fidèl li yo te dwe atire atansyon lapolis ak lajistis, ki te dwe anpeche foul sa deplase menm jan yo konn abitye fè l lè manifestan yo konn ap pran direksyon kay Ariel Henry.
Pastè Marco gen responsabilite l nan masak sila, men leta plis responsab toujou paske yo pa jwe wòl otorite yo. Pa gen anyen ki di pastè a pa fou oubyen pa gen yon ti pwoblèm ki t ap travèse li pandan li te pran desizyon sa. Lè n ap dirije nou dwe wè pi lwen pase pwent nen nou.
Pou tout ti revolisyonè Facebook k ap bat bravo pou mouvman sa epi ki p ap janm pran lari a tankou ti brebi egare sa yo, n ap di yo tout mouvman kont ensekirite dwe byen reflechi pou li pa transfòme tankou masak. Nou paka ap pote tèt nou nan labatwa konsa, bandi yo gen anpil zam lagè nan men yo, nou dwe bat yo ak anpil estrateji epi bon jan kout dwèt. Osnon se ap lave men siye atè!
Atik sa se pwopriyete prive ©️ Gwoup Medya MAGHAITI 2023
