Pòtoprens jou dimanch 13 dawout 2023 a._ « Nan radyo Kiskeya li fè 4 trè », sa se te youn nan eslogan ki te pi popilè pandan 30 dènyè lane ki sot pase la yo. Se te youn nan eslogan tou ki te bay anpil kè kase nan kan bouwo ak koriptè ki te toujou an chat pent pou Liliane Pierre Paul pa avili yo pandan l ap bay nouvèl. Paske jan anpil moun konnen l, jounalis la pa te sèlman bay nouvèl, li te konn plis kòmante aktyalite a yon fason pou ede sila yo ki pa gen anpil konesans yo.
Liliane te reprezante yon modèl san parèy pou 3 dènye jenerasyon yo. Se te gras ak bon jan refleksyon epi konesans li te toujou konn pataje yo atravè jounal 4 trè a ki te konn fè pèp la konprann sak rele demokrasi a vrèman. Jounalis la te toujou mete nou sou men nou kont blofè, manipilatè, bouwo epi magouyè tout plim tout plimay.
Madanm nan sakrifye tout vi li nan defann sa ki pi fèb yo; li te reprezante youn nan pi gwo defansè dwa moun nan peyi a. Dayè li te youn nan jounalis ki te gen pi gwo odyans nan tout depatman peyi a epi li pa te janm pè kanpe goumen. Nou sonje byen kijan li te konn kanpe anfas rejim Duvalier yo ak lòt ankò, presizeman kont Frap, ak rejim Lavalas la ansanm epi rejim PHTK a. Jan moun yo toujou ap di a, Liliane se te yon etènèl opozan ki pa te janm twò alèz ak dirijan ki te konn ap fè demagwoji pandan yo sou pouvwa.
Men fòk nou di tou, Liliane te toujou aprann nou yon bon jounalis pa sipoze nan kole sere ak dirijan yo, paske li toujou fasil pou nèg ki sou pouvwa trennen jounalis nan koripsyon. Malerezman nèg ak mikwo isit pa suiv okenn bon egzanp, yo pwomennen chèche nan bwat leta tankou machann tablèt ki pa jwenn lavant.
Pou kounya, nenpòt moun ka kreye yon paj sou rezo sosyal yo, tankou Facebook oubyen Youtube, achte yon telefòn entèlijan epi rele tèt yo “jounalis”. Nan sans sa, jounalis bò katedral pa respekte anyen nan règleman metye a, yo pa pran distans ak okenn rimè ni move nouvèl. Dayè yo renmen sansasyon, se nan sansasyon yo fè lajan sou rezo sosyal yo nan ekri sa ki pa verite pou atire moun vin sou paj yo pou yo fè degouden. Yo tounen mèsenè, yo ekri pou tout moun depi yo jwenn lajan, kit li se bandi, kit li se raketè, kit li se kidnapè epi kit li nan move zafè. Bagay sa yo tounen yon kansè pou metye jounalis la. Jan yo renmen di: « An nou kontinye kite ti jèn manje, pa bare yo… », lè n ap gade nan mont nou n ap wè li fè 16 zè!
Si sa rive la se pa fòt Liliane Pierre Paul, okontrè li te fè tout vi li ap batay kont zak malonèt sa yo nan metye a. Nou p ap vin prezante Liliane tankou mè Théresa, men fòk nou bat bravo pou Cézar lè li merite sa. Liliane ak tout radyo Kiskeya te toujou pran distans yo ak tout vag sansasyon k ap fè aktyalite. Pa egzanp, jounalis la se te youn nan gwo pèsonaj piblik ki te kanpe kont mouvman « Bwa Kale » a, malgre li te toujou ap denonse aktivite bandi yo. Li te di a klè: « Li pa nòmal pou se popilasyon an k ap bay tèt li jistis nan nivo vyolans sa.» Epi pozisyon sa yo te toujou rann li enpopilè sou sèn politik la.
Nou sezi wè anpil ti jèn fanm ak jèn gason mele avèk yon bann fanatik pouvwa a k ap voye toya sou defen an, kòmkwa se ta lanati k ap bay Jovenel jistis. Men, sa yo pa konnen li plis sanble se mèt chat la ki te manje chat la jan granpè nèg ak zam yo te di li nan yon seremoni. Yo konnen byen Liliane pa gen anyen pou li te wè ak zak ansasinay ki te fèt sou Jovenel la. Pèsonn paka prezante yon eskandal koripsyon ki te eklate sou non ansyen jounalis la. Men, kòm se tèt fele je pete k ap pale, an n kite yo pale. Puiske, rezo sosyal yo bay tout moun tèt pa dwat, dwa pou yo pale jan yo vle!
Nou menm nan MagHaiti, nou pa te janm nan voye toya ni sou Liliane ni sou radyo Kiskeya. Nou te toujou respekte liy editoryal nou epi suiv sa ki bon lakay yo. Nou pa rete anpil bon moun nan kalib Liliane, dayè nou pa gen anpil moun serye nan peyi ankò, sa ki mouri, sa ki nan mawon, sa ki zipe bouch yo pou yo pa viktim. Se valè ki konn enpòtans valè !
Popilasyon an dwe pran san l pou li konprann ak reflechi ki kalite defisi yo fè aprè nouvèl lanmò sa. Nou pèdi yon jounalis onèt, yon defansè dwa moun, yon feminis epi yon moun ki te toujou kanpe bò kote pèp la, malgre tout pèsekisyon ak menas. Yon fanm djanm ki te kanpe rèd tankou wozo.
Pou tout moun k ap kreye bòz sou entènèt la, al revize leson nou anvan nou pale. Marvel Dandin di nou: « Liliane te resi fin bati kay li sa poko gen 3 mwa epi li pa menm gentan jui li ».
Tout listwa koripsyon envante ak move lajan k ap kouri sou Youtube yo pa kanpe sou anyen, epi tout moun ki gen bon sans ta sipoze ripòt paj sa yo, akoz y ap fabrike move nouvèl.
Liliane ale, nou poko konnen ki moun ki pral ka konble vid sa. Men fòk nou di tou gen pepinyè, peyi a gen moun toujou. Menmsi li pa gentan viv nan chanjman li te espere yo, men li dwe ale nan lapè madanm, ou te fè yon travay prèske san gwo repwòch!
Atik sa se pwopriyete prive ©️ Gwoup Medya MAGHAITI 2023
