Selon yon atik jounal Miami Herald pibliye jodi mèkredi 8 novanm 2023 a, yo fè konnen Joseph Vincent, youn nan akize nan lanmò Jovenel Moïse la, ta dwe plede koupab 5 desanm k ap vini la. Jounal la fè kwè, si jijman pase konsa, pwokirè yo ka kondane Vincent pou l pase tout rès lavi l nan prizon.
Lajistis amerikèn te akize Joseph Vincent kòm moun ki te non sèlman patisipe nan konplo a, men tou youn nan moun ki te bay materyèl pou te touye ansyen prezidan an. Pou sa, otorite yo fè konnen akize a ki chwazi bay yon lòt temwanyaj nan mwa desanm nan ta dwe jwenn santans li si tout fwa li ta rekonèt enplikasyon l.
Konsa, menm jan otorite jidisyè yo te fè 3 lòt akize yo gras kote yo ta dwe retire nan pèn yo a, se konsa tou Joseph Vincent ka pa pran prizon pou tout rès vi l vre. Daprè kondisyon ki bay yo fòk li ta bay bon jan prèv sou lòt moun ki nan prizon yo oubyen fòk li ta bay enfòmasyon sou kèk lòt sispèk ki an Ayiti.
N ap soulinye Joseph Vincent se yon ansyen enfòmatè sekrè Drug Enforcement Administration (DEA). Se nan sikonstans sa tou jounal ameriken an presize Joseph Vincent malgre li pa t nan ajans la ankò, te profite rele kanmenm ansyen responsab li a nan DEA tousuit aprè lanmò ansyen prezidan an lakay li 7 jiyè 2021 an.
Atik sa se pwopriyete prive ©️ Gwoup Medya MAGHAITI 2023
