Doktè Norvensky Orélien abòde sitiyasyon grèv rezidan yo nan Lopital Jeneral Dayiti a

Depi kòmansman mwa janvye, lopital Jeneral Dayiti ap konnen yon sitiyasyon grèv anndan li, akoz plizyè rezidan deside kanpe travay yo pou move kondisyon. Rezidans sa yo mande ogmantasyon salè yo parapò avèk sitiyasyon ekonomik lan, kidonk doktè Norvensky Orelien deside plase mo li sou sa ki lakoz grèv sa anndan espas la jounen jodi dimanch 22 Janvye 2023, sou radyo Magik 9.

Selon Doktè Norvensky Orelien : « Jodia fè yon mwa depi n te ekri ak notifye responsab yo jiskake nou te oblije pran desizyon fòse, men yo te fèmen zòrèy yo.»

Lopital Jeneral Dayiti (UEH) nan moman n ap pale la, gen yon grèv k ap bouyi ladan l depi plizyè jou, men otorite nan kesyon sante yo pa montre vrèman pwoblèm sa se priyorite l. Toujou selon Doktè Norvensky Orelien :« Sante popilasyon an pa priyorite, an n imajine yon moun ki ta gen gaz Lakay li ki fini, li t ap prese vit jere sa paske li pa fè manje, men se bokou pi plis pou sante moun ki se yon ijans.»

Kondisyon salte ak malpwòprete anndan Lopital Jeneral la, ap dechennen chak jou pi plis, pa vrèman gen yon espas ki sen pou moun travay vre. « Pwoblèm dlo ak salte pa janm rezoud vre, malgre netwayaj sipèfisyèl jiskake Jounalis vin dekouvri li, nou pa te dwe aksepte rete konsa, malerezman nou menm moun nou gen kapasite pou n kouri pou obstak yo, sitou lè n gen yon objektif, tankou pran swen malad, kontinye avanse avèk fòmasyon nou, jiskake rive nan evidans, nou pa sipoze ap kite yo trete konpatriyòt nou konsa», sa yo se pawòl doktè Norvensky Orelien.

Medsen rezidan yo pa sispann pwoteste tou pou ti kras lajan y ap ba yo anplis move kondisyon tretman y ap bay swen avèk pasyan yo, alòske pouvwa anplas la te ogmante pri gaz la epi tout bagay vin chè nan peyi an, selon doktè Norvensky Orelien :« Nou se granmoun, li pa lojik pou yon jenn gason ki nan laj 30 an oubyen prèske 30 an anviwon pou li fin avèk etid li, men lè pou li desann se nan prete li ye, pandan n ap bay 11250 goud chak lè n sonje, nou bay li lè l n vle, jiskake nou te di leta deside bay li an 2 tranch », selon travayè lasante a.

Sitiyasyon grèv k ap boujonnen Lopital Jeneral la lakoz anpil malad oblije ale, se kèk grenn ki rete, malgre pifò sèvis ki gen rezidan yo pa fonksyon, tankou dèmatoloji, òdontoloji, òtopedi, seksyon zòrèy ak nen, elatriye.

«N ap reprann travay lè kondisyon yo reponn, otorite yo deside aji sou ansanm revandikasyon nou yo» se sa doktè Norvensky Orelien fè konnen.

Atik sa se pwopriyete prive ©️ Gwoup Medya MAGHAITI 2023

Comments

commentaires