Jounen jodi vandredi 27 janvye 2023 a, Frantz Elbé ki se direktè lapolis la reyaji aprè lanmò plizyè polisye nan zòn Lyankou epi lòt polisye ki viktim nan Kwadèboukè ak Petyonvil.
25 janvye ki sot pase a la, 7 polisye mouri anba bal bandi nan Lyankou. Dram sa a pat sispann revòlte konsyans polisye ak sivil ki te fè manifestasyon nan plizyè vil yè jedi a.
Selon wo kòmandan Lapolis Frantz Elbé :« Lapolis la pran kou, men nou p ap bese men nan batay n ap mennen kont bandi, nou p ap kase tèt tounen nan sitiyasyon n ap konnen an. Solisyon li se yon tèt ansanm, inite, men nan men avèk tout sektè nan peyi a.»
Plizyè vil nan pwovens ak kapital te leve kanpe ayè jedi 26 janvye a, anpil lekòl te oblije fèmen pòt yo pou evite malè. Anpil polisye fache e mande leta pou pran responsabilite l. Bò kote pa li, direktè polis la mande ak tout ajan pou yo kalme yo.
«Se sak fè n ap adrese avèk tout polisye yo, kòmandan nou, gran frè nou ki fè apèl avèk nou pou n gade trankilite nou. N ap mande tout polisye yo pou n konsantre fòs nou, enèji nou epi kontinye oryante li kont bandi yo», se sa Direktè lapolis la Frantz Elbé deklare.
Soulèvman ak kolè polisye, anplis sitwayen yo te fè yo rive lakay premye minis defakto a kote yo te rive kraze plizyè materyèl, pete kawoutchou, sezi zam, epi menm al dèyè Premye minis la nan aryopò, kote li t ap soti nan peyi Ajantin.
Direktè lapolis Frantz Elbé te kontinye pou li ajoute :« N ap anonse polisye yo rapid vit n ap pran mezi pou n ranfòse komisarya ak inite espesyalize, tankou zam epi lojistik. Anplis, lòt mezi nan ankadre nan lit y ap mennen chak jou kont bandi yo».
«Polis Nasyonal Dayiti deside deklanche yon nouvo operasyon ki pral gen pou li pote non « Tònad 1» nan repons kont zak bandi yo fè sou popilasyon epi Lapolis. Paske, fòk bandi yo peye pou sa yo fè», selon pawòl direktè Lapolis la.
Anpil derapaj ak brigandaj te fèt ayè jedi an, kote peyi an te leve an boulatcha. « Fòk nou evite tout fòm derapaj, manipilasyon ki ka mete enstitisyon nou renmen anpil la, enstitisyon nou sakrifye n anpil pou li an, peyi nou renmen anpil la. Polis la se yon enstitisyon repibliken ki reprezante lalwa ak lòd.»
Sou lòtbò anpil enstitisyon dwa moun ak lòt ankò te revòlte epi mande pou ranfòse lame ak enstitisyon an nan lide pou l ka vin efikas nan kad operasyon li.
Selon wo kòmandan Lapolis la :« Tout polis dwe mete men nan men pou kontinye konba pou sekirite ak trankilite ka tabli nan peyi a. Yon maryaj polis ak popilasyon epi polis ak laprès. Nou ka fè anpil bagay avèk yon ti kras bagay.»
Direktè polis la te tou pwofite fè konnen genyen operasyon k ap mennen pou enstitisyon an ka pran kadav polisye yo bandi te abandone nan lari aprè dram lan.
Atik sa se pwopriyete prive ©️ Gwoup Medya MAGHAITI 2023
Discussion about this post