Nan yon adrès pou nasyon an ayè vandredi 27 janvye 2023 a, premye minis Ariel Henry bay polisye yo pawòl li pou fè yo konnen y ap ka resi jwenn bon jan materyèl yo te toujou konn ap mande yo pou konbat bandi nan peyi a. Nan menm sans sa, chèf gouvènman an mande direktè jeneral polis la, Frantz Elbé yon rapò sou denyè evenman yo ak bon propozisyon nan 24 èdtan.
Pandan adrès pou nasyon sa a, chèf gouvènman an fè konnen li menm ak tout gouvènman li an ap travay pou jwenn solisyon ak ensekirite a ki manyen manm menm polisye yo, epi li te tou bay direktè jeneral lapolis la, Frantz Elbé 24 èdtan pou bal rapò sou lanmò 4 polisye ki te mouri nan metivye, komin Petyon vil, epi 6 sila yo prezime bandi savyen te etènn souf yo mèkredi 25 janvye pase a.
“Prensipal revandikasyon polisye ak polisyè nou yo ki pran lari se ba yo bon jan mwayen pou yo Konbat move zangi. Nou vle kwè kout men nou mande a ap resi rive vrèman” daprè sa premye minis lan te deklare.
Nan yon lòt bò menm jan anpil moun t ap tann li, premye minis lan resi pale sou dosye polisye yo ki pa sispann tonbe anba bal bandi pou komansman ane a.
“Nan moman difisil sa kote anpil fanmi gen dlo nan je n ap kanpe djanm, n ap mare ren nou e n ap di annavan, m ap di nou fò nou pa tronpe nou sou advèsè n, fò nou pa bat sak pay la pou bourik la. Nou pap kite bandi tout plim tout plimay simen divizyon nan mitan nou, gouvènman m ap dirije pou yon ti bout tan an ak lapolis n ap mache tèt kole pou pou tabli meyè kondisyon lavi nan peyi a”, se sa chèf gouvènman an soulinye pandan l te tou profite fè konnen nan wikenn lan l ap gen yon konsèy minis toujou nan kad pou diskite sitiyasyon polisye nou yo ap travèse pou moman an.
N ap raple premye minis lan te dwe pale depi jedi 26 janvye pase a, men sa pa t rive fèt akòz gwo mouvman pwotestasyon polisye yo te tanmen nan preske tout vil peyi a akòz zak ansasinay polisye parèy yo nan Lyankou ak nan Metivye, sa ki te mennen tou mouvman douvan ayeropò Tousen Louvèti a kote yo t al resevwa chèf Konsèy Siperyè Polis Nasyonal la(CSPN).
Atik sa se pwopriyete prive ©️ Gwoup Medya MAGHAITI 2023
