Jounen jodia Mèkredi 14 Septanm 2022 a, plizyè vil nan peyi a kontinye bloke pou egzije otorite yo rezoud kriz k ap taye banda, tankou lavi chè, ratman gaz la, ensekirite, depresyasyon goud la, elatriye.
Jan sa te anonse plizyè kote nan peyi a. Mobilizasyon yo kontinye nan preske tout vil nan peyi a. Pèp la kontinye pran lari pou denonse move kondisyon y ap viv epi mande pou premye minis defakto Ariel Henry kite pouvwa a.
Plizyè vil pou nou site la yo, Okap, Wanament,Gonayiv, Tigwav, Leogan, Jeremi, elatriye. genyen barikad ak dife epi kout wòch k ap tire nan plizyè zonn pou moun yo di yo bouke ak mizè k ap dechèpiye lavi pèp Ayisyen an.
Pou kapital peyi a, anpil zonn tankou Delmas 55, 65, 40b, Petyonvil, Site Solèy, kontinye bloke pou menm rezon tout lòt zonn yo deside leve kanpe a. Pou moman sa, gen plizyè manifestasyon epi kote ki gen barikad nan Pòtoprens.
Revandikasyon pèp la nan tout peyi a pa chanje, se toujou menm bagay y ap mande otorite yo . Moun yo kontinye ap denonse ensekirite, lavi chè, grangou, ratman gaz la, elatriye.
Depi aprè Premye Minis Ariel Henry te anonse pri gaz la pral monte dimanch lan, paske leta p ap sibvansyone gaz la ankò, tout aktivite preske pa te ka fèt jan sa te konn ye avan. Akoz anpil mouvman ta pral fèt ak anpil zonn ta pral rive bloke.
Atik sa se pwopriyete prive ©️ Gwoup Medya MAGHAITI 2022
