Nan kad ankèt Inite lit Kont Koripsyon (ULCC) mennen sou jan responsab yo jere meri Wanament la sòti 2016 pou rive an 2023, yo fè konnen gen plizyè ka koripsyon ki rive fèt nan meri a. Konsa, ULCC nan rapò ankèt yo a lonje dwèt sou ajan enterimè Wanament la, Luma Demetrius, Crétilia Pierre-Antoine, ak Jose Laguerre kòm moun ki dakò zak koripsyon fèt nan bwat la, men tou kòm moun ki itilize pozisyon yo pou te fè move zafè.
ULCC rapòte pou pi piti 3 ka koripsyon yo jwenn ki te fèt nan meri a pandan peryòd 2016-2023 sa. Premye ka a, se dèske responsab meri yo te vann Alfred Castin yo idantifye kòm kouzen pwòch mari ansyen majistra vil la, Crétilia Pierre-Antoine, yon baskil Daihatsu pou yon ti bouda monnen ki te 20 000 goud. Yo soulinye, materyèl sa vann san okenn otorizasyon Kou Dèkont (CSCCA), sa ki fè yo vyole atik 5 alineya 11 nan dekrè 23 novanm 2005 la ki di se enstans sa ki la pou fè tout evalyasyon nesesè yo.
Malgre Alfred Castin se pwòch ansyen majistra a, anketè yo soulinye madanm Pierre-Antoine te chwazi pa siyen papye machin nan, paske yo estime l pa t vle pou pyès moun sispèk li te patisipe nan òganize aktivite ki te fèt pou l te vann Castin machin nan pou yon ti kras lajan an. Nan papye machin nan, yo di se prezidan Konsèy minisipal la epòk la, Luma Demetrius ak moun ki te vinn dèyè l la defen Joseph Amos ki te siyen l.
Pou lòt ka koripsyon yo, yo fè konnen responsab sèvis teknik meri a, Jose Laguerre ki se prezidan inite jesyon mache a (UGM) epi direktè mache fwontalye Wanament la, te pran yon moto Haojin wouj pou enstitisyon an, yon materyèl ki ta pral pèdi kèk tan aprè tandiske yo soulinye konsène a pa t fè okenn deklarasyon pou sa, e pa janm remèt lajan moto a te koute a jan l te fè konnen an. Nan menm sans sa, madanm Antoine te temwanye kont mesye Laguerre pou di li kenbe lakay li divès lòt ekipman meri a, san l pa menm gen otorizasyon pou sa.
Anplis moto sa ki pèdi lakay responsab sèvis teknik meri Wanament la, anketè yo fè tout moun konnen nan dat ki te 8 mas 2022 a, meri a te rive pèdi yon jeneratris Kubota nan lakou meri a. Mete sou sa, jou ki te 16 septanm 2022 a, ajan yo di pwosè vèbal jij lapè Louis Jacques Elie te fè montre meri a te pèdi plizyè santèn materyèl ak ekipman, akòz kèk endividi ki te antre al piye espas la.
Yon lòt kote, anketè ULCC yo mansyone Jose Laguerre malgre tout plas li okipe nan meri a, yo idantifye l kòm premye moun ki vann meri a materyèl enfòmatik pou l fonksyone. Yo di li fè sa, se gras ak relasyon l pataje ak aktyèl majistra a, Luma Demetrius ki fè l gen tout enfòmasyon sou kòmand ak sa yo achte pou meri a. Pi lwen yo menm revele yo jwenn prèv antrepriz li ki pote non “LAGOSECOM” te resevwa nan men òganizasyon Entènasyonal Oxfam 435 mil goud sou kont bankè antrepriz la.
“ULCC mande pou aksyon piblik mete kont moun sa yo, Luma Demetrius pou abi fonksyon menm jan atik 12 mas 2014 la di l nan atik 5.5 li a, Crétilia Pierre-Antoine pou abi fonksyon ak enterè ilegal li te pran tankou atik 5.5, 5.13 menm lwa sa kondane l la, epi kont Jose Laguerre pou detounman byen piblik ak deli kote l te itilize enfòmasyon enstitisyon an pou pwòp enterè l, yon bann bagay atik 5.4, 5.11 kondane nan lalwa 12 mas 2014 la“, daprè divès rekòmandasyon enstans la fè kont sitwayen sa yo.
Atik sa se pwopriyete prive ©️ Gwoup Medya MAGHAITI 2023
