Nan divès operasyon lapolis tanmen ayè jedi 10 dawout la nan zòn Onavil, yo fè konnen gen 8 prezime bandi ki rive pèdi lavi yo nan fè fas kare ak yo. Nan menm operasyon sa, yo fè kwè yo pran yon fizi AR15, 4 chajè ak katouch plizyè lòt kalib.
Selon enfòmasyon enstitisyon polisyè a pataje, pami 8 endividi sa yo gen 4 nan yo se ta moun ki pi pwòch ak prezime chèf gang Kanaran an “Jeff“. Zo Manno, Yvio, Jerry alyas Kafou sitèn, Fokè se non sila yo yo rive bay idantite yo.
Nan menm sans sa, responsab yo soulinye gen plizyè ajan nan kò UDMO lwès 2 a yo mete sou teren an ak plizyè gwo materyèl pou entèvansyon sa yo. Kraze tout kote endividi ak zam konn jwenn refij yo, kote yo konn mete moun yo kidnape, bouche tout ti kote yo konn kache pou tire ak lapolis se prensipal misyon operasyon sa yo ki vize tou kwape tout bandi nan zòn Onavil, Mòn kabrit, Kanaran elatriye.
N ap raple menm operasyon sa yo te tanmen nan vil Gonayiv espesyalman nan Lakwa Peris ayè jedi a, kote lapolis di gen plizyè kote gwoup “Kokorat san ras” yo konn kache ki gentan kraze.
Atik sa se pwopriyete prive ©️ Gwoup Medya MAGHAITI 2023
