Pou pi piti 3 moun rive pèdi lavi yo nan yon atak gwoup gang Savyen an fè jodi mèkredi 16 dawout la sou popilasyon Ti rivyè latibonit la. Selon kèk medya lokal, pami moun sa yo ta gen yon etidyan nan agwonomi ki mouri anba bal tou.
Peter Fils Bathelmy se non etidyan 2yèm ane agwonomi an ki rann souf li nan atak gwoup ame Savyen an fè. Pou sa k gen pou wè ak lòt 2 moun yo, daprè enfòmasyon ki bay yo se ta yon mason ak yon lòt sitwayen ki ta mouri sou kabann lopital.
Yon lòt bo, sou tout rezo sosyal yo anpil moun pa sispann lanse alèt sou plizyè zòn akòz menm gwoup ame sa ki ap antre kay peyizan yo pou piye afè yo. Pat Chwal, Mowo Pèy, palmis, lakwa Peris, Vèrèt, Miwo dejaden se kèk nan zòn endividi ak zam yo atake.
Pandantan sa, gwoup gang Kokorat san ras la nan bò pa li ta mete dife nan yon machin lapolis nan zòn lakwa Peris. Daprè Radyo Tele Métronome, pa gen okenn polisye ki sòti viktim.
© Tous droits réservés – Groupe Média MAGHAITI 2023
