Nan yon konferans pou laprès ki tanmen jodi lendi 3 avril la, direktè Òganizasyon Sitwayen yo pou yon lòt Ayiti(OCNH) a, mèt Camille Occius deklare gen 195 moun ki tonbe anba bal prezime bandi pou mwa mas la. Li fè konnen pami tout viktim sa yo plizyè fanm te rive tonbe kote menm fanm ansent pa epanye nan sitiyasyon ensekirite n ap viv la.
Nan rapò sa mèt Camille Occius bay la, li fè konnen nan 195 moun ki mouri anba bal yo, se prèske tout kouch nan sosyete a ki viktim. Ti bebe, fanm ansent, fanm, tifi, tigason, polisye, sòlda nan lame ayisyen, etidyan elatriye.
“Sa vle di se 195 moun pandan mwa mas la ki tonbe anba bal asasen. Te gen 10 fanm pami yo te gen yon fanm ansent ki te tonbe anba bal, 6 tifi, 4 tigason, yon bebe 8 jou, 3 polisye, yon ajan FADH, epi yon etidyan“, daprè chif responsab la bay.
Nan yon bò, li fè konnen se 5 depatman ki gen plis ensekirite nan peyi a. Li site depatman lwès ki pou kont pa l gen 172 moun ki mouri ak bal, nan Sid gen 4 moun, nan Sidès yo resanse 8 viktim, nan depatman Sant chif la ak 2 grenn moun, epi nan Latibonit yo jwenn se 7 moun ki mouri.
Nan menm sans lan avèk nivo chif depatman lwès la ye a li soulinye chif sa reprezante 88,2 % nan ka yo idantifye yo. Li di tou, òganizasyon an rive jwenn gen 3 komin malè plis pandje sou yo, se komin Pòtoprens, Petyonvil, ak Dèlma.
Yon lòt bò, mèt Occius deklare se sèl depatman Nip li ka di ki gen yon ti kras sekirite nan peyi a. Tout sa se gras ak komisè gouvènman yo a ki se Ernest Muscadin, daprè sa l fè konprann.
Atik sa se pwopriyete prive ©️ Gwoup Medya MAGHAITI 2023
