Nan yon atik Miami Herald ekri jodi vandredi 14 avril 2023 a, yo fè konnen responsab You Tube yo efase chanèl You Tube «Izo», ki se chèf gang Vilaj Dedye a. Daprè sa yo di, desizyon sa pran se akoz chèf gang nan pran plezi l nan pibliye videyo ki pouse moun fè vyolans.
Kèk jou aprè lidè gang 5 segonn nan te fin montre tout moun platfòm You Tube rekonpanse l ak yon plak “You Tube Creator Award“, menm platfòm sa te deside siprime paj ofisyèl Izo a ki pote non “Izo 5 Segonn Vilaj Dedye“, akòz plizyè Ayisyen te rive siyen yon petisyon ki estime li pa nòmal pou yon bandi ap sèvi ak You Tube pou montre enfliyans li douvan je monn lan.
«Nou fèmen chèn sa paske l vyole règ direktif kominotè nou yo, ki entèdi tout kontni ki ka pouse lòt moun komèt zak vyolans», se sa yon pòt pawòl platfòm nan Jack Malon deklare bay jounal Ameriken an.
Nan bò pa sila yo ki te siyen petisyon an, Izo ki bay tèt li non atis la pa gen pyès dwa pou l gen aksè ak YouTube, ni l pa ta dwe ap resevwa lajan sou do plis pase 100 000 abòne li te genyen yo.
“Yon moun ki chaje ak vis konsa, ki responsab yon valè gwo krim nan peyi a nan moman sa yo pa merite okenn lwanj, okenn rekonesans epi okenn platfòm pou montre enfliyans li“, selon sa siyatè yo ki anviwon 20 339 moun estime.
N ap raple se menm chèf gang sa ki te tann pyèj pou lapolis kote 5 nan yo te pèdi lavi yo nan Vilaj Dedye nan dat ki te 31 mas 2021 an.
Atik sa se pwopriyete prive ©️ Gwoup Medya MAGHAITI 2023
