Gen plis pase 6 jou depi popilasyon nan Ti rivyè ak Ansyen otorite nan depatman an pa sispann rele osekou pou divès zak banditis k ap poze nan plizyè lokalite nan Latibonit, presizeman nan palmis, Savyen, Anba Bouk, Lika, Ti rivyè, elatriye. Kote gwoup gang Jean Denis, Ti Klèno, Nikson, Jonas, elatriye ap twoke konn yo. Sa ki lakoz gen anpil kay ki piye, kay ki boule epi menm fanm ak tifi pa epanye nan zak sa yo.
«Anplis, bandi yo vòlè anpil moto Al boule machin epi antre nan mache bouk la.» selon temwanyaj Kerline Céus.
Konfli gè gang nan Latibonit lan kòmanse depi lè chèf gang Arnel Joseph te mete pye li nan zòn nan an 2019, kote anpil nan nèg Savyen yo tou sèvi li sòlda. Sa ki te lakoz yo te tire sou komisarya ak piye biznis Moun nan zòn yo. Kèk tan aprè gwoup gang Jean Denis ak Kanal Divan te pral kanpe anfas li pou reziste kont zak banditis nan bouk la.
«Odma te vin fè kowalisyon ak Arnel Joseph pou dirije Savyen, aprè lanmò nèg sa yo. Yon bandi ki rele Ti Klèno te vin deside pa aksepte lapè ki te tanmen nan mitan Palmis ak Savyen epi Ti rivyè, epi deside rete nan blòk li», toujou selon temwen an.
Nan rantre vil la ki se Lika ak nan bouk, se kote ki plis viktim ak andanje parapò ak zak bandi nan lòt zòn yo, malgre popilasyon nan bouk te reziste nan mete barikad ak anbiskad pou anpeche yo antre nan lokalite yo, san ranfò lapolis puiske se omwen 4 grenn polisye ki pou sekirite lokalite yo.
« Nou paka bay bilan egzat, sofke gen anpil kay ki piye nan bouk, lokalite Estenyo Vensan, Lamatinyè, anba sous epi anba tèren. Anplis, gen anpil moun ki kouri kite kay yo pou evite viktim.» pawòl Kerline Céus.
«Men m ka di pami 15 kay ki boule, gen youn ki boule ak 2 granmoun ladan li nan ri kapwa ak Louvèti», selon temwen an.
«Pou m ajoute gen 3 sivil ki mouri, youn ladan yo se yon chofè taksi ki rele Ti Sina nan bouk la, kote ki gen anpil kay ki piye» selon temwanyaj Kerline Céus.
Konfli ki gen nan zòn Latibonit lan, kote gwoup gang ap afwonte yo ansanm. Plizyè ansyen senatè tankou Carl Murat Cantave ak Youry Latortue te oblije fè yon twit pou mande sekou pou moun nan Latibonit.
Atik sa se pwopriyete prive ©️ Gwoup Medya MAGHAITI 2022
Discussion about this post