Yon dominiken sou wout pou l mouri Pòtoriko aprè lanmò yon ayisyen 3 lane

Yon dominiken ki pote non, Alcibades De Paz nan wout pou jwenn lanmò oswa
pase rès lavi li nan prizon nan peyi Pòtoriko. Lajistis nan peyi sa ka pran desizyon sa, paske sitwayen an, ki se kapitèn yon bato ki t ap transpòte migran ta rive responsab lanmò yon ayisyen 3 lane nan lanmè, pandan li t ap fè dilijans pou otorite yo pa t arete l sou lanmè a, daprè jounal Listín Diario.

“De Paz t ap dirije bato a pandan ajan fòs aksyon rapid ini biwo polis Pòtoriko yo te tante kanpe l sou wout li, men bato a te chavire. Pami 39 migran san papye ki te genyen yo, yon ti gason 3 lane yo te vinn jwenn li pèdi konesans, medsen yo ki te tante bali lavi lopital la te vinn wè li mouri”, toujou daprè sa jounal la fè konnen pandan yo byen presize se ayisyen timoun lan ye .

Pami enfòmasyon jounal dominiken an fè jwenn nan kad dosye sa ki sòti nan biwo pwokirè Pòtoriko a, Alcibades De Paz se te kapitèn bato sa a ki t ap transpòte 39 migran san papye sòti Repiblik Dominiken pou rive Pòtoriko jou ki te vandredi 23 desanm 2022 a.

Nan menm kad dosye sa a, jounal la mansyone sitwayen dominiken an te parèt douvan jij Bruce McGiverin ayè mèkredi 11 janvye 2023 a, nan kou federal San Juan. Li gen pou l rete nan prizon jouskaske l gen yon lòt odyans, daprè lòd jij la pase.

Pandantan sa, malgre konstitisyon 1952 peyi Pòtoriko entèdi zafè pèn lanmò a, yon jij ki nan tribinal ameriken sou zile a pran desizyon pou De Paz sibi pèn lanmò oubyen pase tout rès vi l nan prizon si sa ta rive akize a ta plede koupab.

Pou kounya, pa gen pyès presizyon sou eta sante lòt migran yo ki te sou bato a, ni si gen lòt ayisyen. Men pwokirè ameriken Pòtoriko a, Rico W.Stephen Muldrow deklare jefò ap kontinye fèt pou kraze rezo moun k ap fè migran pase sou lanmè, tout sa k ap pwofite epi mete lavi moun sa yo an danje, sa ki fè gen gwo menas pou sekirite nasyonal peyi a.

Atik sa se pwopriyete prive ©️ Gwoup Medya MAGHAITI 2023

Comments

commentaires