Maten lendi 18 mas 2024 la, abitan nan Petyonvil fè konnen yo leve jwenn yon dizèn kò san vi nan komin nan. Selon Radyo Karayib, kadav moun yo twouve yo divès kote sitou nan ri Panamerikèn, bò simityè Petyonvil la ak lòt riyèl toujou.
Nan imaj ki vin jwenn nou yo, nou rive remake kò moun sa yo gen enpak bal sou yo. Sepandan, kontrèman ak enfòmasyon ki fè kwè moun sa yo se ta move je, plizyè abitan deklare nan mikwo Radyo Karayib se moun nan zòn nan moto pase krible yo ak bal nan lannuit dimanch 17 mas la.
Paralèlman, gen yon sitiyasyon panik ki genyen byen bonè maten lendi a nan zòn Laboul ak Tomasen kote bal pa sispann tire.
“depi 3è jouskaprezan se pa 2 kout bal k ap chante la, m pa konnen sa k genyen men se bal m ap tande“, daprè sa yon abitan zòn Laboul fè nou konnen.
Pou kounya, idantite viktim yo pa revele. Men, sitiyasyon an toujou mete laperèz bò kote moun yo nan Petyonvil ak nan zòn Laboul epi Tomasen, kote moun paka sòti kounya la.
Atik sa se pwopriyete prive ©️ Gwoup Medya MAGHAITI 2024
