Aprè tout dispozisyon gouvènmantal ki pran kont ayisyen aprè pwoblèm rivyè masak la sou fwontyè Dajabón nan, kounya Federasyon Nasyonal Travayè Kretyen Transpò Sosyo yo (FENATTRANSC) nan Repiblik dominikèn deside ayè vandredi 15 septanm 2023 a, entèdi tout chofè l yo pote migran ayisyen nan machin yo. Desizyon sa ap kòmanse aplike depi lendi k ap vini la e li konsène ni ayisyen ki gen papye ni sa ki pa gen papye yo tou, selon El Caribe.
“Nou pran desizyon pou depi lendi k ap vini la, pou nou entèdi transpò tout moun ki gen nasyonalite ayisyen nan machin nou yo, kit yo gen papye kit yo pa genyen. Mezi sa yo ap respekte nan kapital la, ak nan tout lòt pwovens peyi a pou kèk rezon sekiritè epi paske ayisyen yo tounen yon popilasyon danje pou nou ak tout lòt pasaje yo”, selon sa lidè federasyon an, Mario Diaz deklare.
Mete sou sa, jounal dominiken an fè konnen sendikalis la konseye pou tout lòt sendika transpò yo ta fè menm jan avèk FENATTANSC. Li mande sa konsa, paske li estime si yo kontinye pote ayisyen nan machin yo se ap yon gwo malè pandje sou tèt sitwayen dominiken yo akòz plizyè nan ayisyen yo konn gen kouto ak lòt zouti travay sou yo. Zouti ki selon li menm, yo ka itilize pou atake yo.
Bò kote moun ki konn lwe machin ak moto yo, chèf sendika transpò kretyen yo tanmen menm entèdiksyon yo, kont tout migran ayisyen yo. Chofè moto yo ki nan sendika sila pa gen dwa pou pote ni menm lwe ayisyen moto yo, kèlkeswa chofè ki ta vyole lòd sa yo ap tonbe anba sanksyon kote responsab yo ap tou mete yo deyò nan FENATTANSC, toujou daprè jounal dominiken an.
“Nou paka fè moun san kontwòl sa yo ki ap fè krim chak jou konfyans“, se sa Mario Diaz di pou defann dezisyon li pran ak lòt responsab yo. N ap raple, mezi sa yo pran se nan lide pou pwoteste nan fason pa yo kont konstriksyon kannal ayisyen ap fè pou pran priz dlo nan rivyè masak la sou fwontyè Dajabón nan.
Atik sa se pwopriyete prive ©️ Gwoup Medya MAGHAITI 2023
