Jounen Jodi vandredi 12 Avril 2024 la, gouvènman Repiblik Dominikèn nan garanti p ap gen patipri sou zak vyòl ajan Direksyon Jeneral Migrasyon yo te fè sou ti fi 14 an ki gen pou nasyonalite ayisyèn nan, nan zòn Punta cana. Otorite yo ap mennen ankèt sou sa a, selon sa a jounal Listin Diario rapòte.
Selon pòt pawòl prezidans lan Homero Figueroa li di li vrèman regrèt sa a ki pase a epi li bay garanti sa a pa pral rete san pini. Li ankouraje popilasyon an pou l fè lajistis konfyans ak pwoteksyon dwa moun puiske yo gen pou devwa garanti yon anviwonman sen nan yon respè mityèl ant etranje ki san papye yo ak ajan imigrasyon yo, toujou selon sa a jounal Listin Diario fè nou konnen sou dosye a.
«Gouvènman an voye jete tout aksyon k ap vyole dwa moun ak menase entegrite fizik yo sou tèritwa a kèlkeswa nasyonalite ak kondisyon moun lan», selon sa a pòt pawòl laprezidans lan, Homero Figueroa, ajoute.
Pou fini, gouvènman Dominiken an kontinye pou li di li angaje l epi mete tout resous ki disponib yo pou idantifye ak tradui lajistis moun ki fè zak malonèt sa a. Gouvènman an ap raple n tou li gen pou responsabilite prezève yon leta k chita sou dwa ak valè fondamantal yo antanke peyi paske li p ap kite enpinite blayi kò l an Repiblik Dominikèn.
Atik sa se pwopriyete prive ©️ Gwoup Medya MAGHAITI 2024
