Nan yon nòt UNICEF pibliye vandredi 10 me 2024 la, li fè konnen malgre nivo vyolans yo kontinye vize moun ki nan zòn Pòtoprens lan, ajans imanitè Nasyonzini ak patnè li yo aktif sou teren an epi ogmante jefò yo pou konbat malnitrisyon.
«Malgre reyalite a k ap chanje epi sikonstans difisil sou teren an, Fon Nasyonzini pou Timoun (UNICEF) rete angaje l pou li ranfòse repons li kont malnitrisyon nan peyi Karayib la pandan y ap travay men nan men avèk Ministè Sante piblik an Ayiti ak patnè li yo», se sa yo fè konnen atravè nòt sa a.
Sou lòtbò, chèf pwogram nitrisyon UNICEF la, Roger Sodjinou, te di nan yon mwa gen anviwon 30000 ti moun ki pa ko gen 5 an ki te fè depistaj pou malnitrisyon, pandan plis pase mwatye nan yo (16000 timoun) te resevwa swen ki apwopriye pou konbat sa a.
Nan tan kriz sa a, vyolans yo paralize aktivite imanitè yo. Moman pou nou aji a se kounye a.
«Aksyon ijan ki nesesè pou anpeche ak trete malnitrisyon timoun yo se bay kominote yo aksè ak dlo ansanm ak asenisman epi pwoteje fanm ak ti moun», se sa a chèf UNICEF la deklare nan sa ki gen pou wè ak batay li vle mennen kont malnitrisyon an Ayiti dènyè tan sa yo.
Pou fini, nan dènyè atak gwoup gang ak zam fè nan Pòtoprens yo, UNICEF ak kèk lòt patnè te rive bay plis pase 5000 ti moun ki soufri maladi «Émaciation ou amaigrissement» bon jan kalite swen nitrisyonèl.
Òganizasyon an te bay 5000 timoun ki gen laj 6 ak 59 mwa sipleman vitamin A tou, nan mwa mas ki sot pase la.
Atik sa se pwopriyete prive ©️ Gwoup Medya MAGHAITI 2024
