Nan yon atak yo fè, bandi ak zam rive pran kontwòl komisarya Gresye a nan lannuit vandredi 10 me a pou antre jodi samdi 11 me 2024 la. Selon imaj k ap pataje sou rezo sosyal yo endividi ak zam yo boule yon machin nan lakou komisarya a ansanm ak plizyè kay nan komin nan.
An konsekans, se yon sitiyasyon ki lakòz popilasyon an oblije kouri kite Gresye, pandan bandi yo yo menm anvayi espas yo kote yo pa sispann boule kay moun yo. Yon lòt bò, divès imaj montre abitan yo ak valiz sou tèt nan lide pou chape poul yo pou evite viktim anba bal.
Pandantan sa a, sòti mwa fevriye a pou rive fen mwa mas 2024 la, selon Rezo Nasyonal k ap Defann Dwa Moun (RNDDH) se anviwon 15 batiman lapolis bandi ak zam boule. Mete sou sa a, gwoup nèg ak zam yo kraze 2 lokal lapolis ki se sou komisarya Bon Repo a ak sou komisarya Dèlma 3 a.
N ap raple, nan atak nèg ak zam te fè nan komin Kafou jedi ki te 18 avril 2024 la, anviwon 8 moun te pèdi lavi yo. Nan menm moman sa a tou yo te tante pran kontwòl komisarya zòn nan tout moun konnen sou non “Omega“.
Atik sa se pwopriyete prive ©️ Gwoup Medya MAGHAITI 2024
