Pou jounen jedi 15 septanm 2022, plizyè zonn nan Pòtoprens ak lòt pwovens yo kontinye mete gwo barikad pou manfifeste kont premye minis Ariel Henry, akoz ratman gaz ak lavi chè, ensekirite, elatriye.
Depi nan maten gen anpil kote moun yo gentan bloke, moun yo sèvi ak tout kalite bagay, tankou branch bwa, fil kouran, fatra, playoud, chèz, ròch epi kawoutchou, elatriye. k ap boule pou anpeche tout aktivite fonksyone nòmalman.
Plizyè kote nan pòtoprens kontinye bloke pou kounya. Avni Poupla bloke nèt. Gen anpil branch bwa, fil kouran, avèk kawoutchou k ap boule ki sèvi kóm barikad pou anpeche moun pase.
Gen anpil lòt zonn nan depatman lwès la, tankou delma 83, lali, kanapevè, boudon, Tomasin , pèleren, delma 30, 48, Avni Christòf ki bloke nèt. Anpil etidyan deside bloke wout yo ak playoud, chèz pou anpeche sikilasyon an fèt.
Aktivite yo paralize, prèske pa gen machin prive ni piblik kap sikile pou jodia, moun yo prèske pa al vann nan mache, gen prezans kèk ti machann k ap vann devan lakay yo.
Gen kote moun yo kòmanse ap voye wòch, sitou nan zonn Dèlma. Padanstan, genyen ki tou pwofite dechouke kèk biznis yo jwenn sou wout yo. Gen plizyè moun yo pa idantifye maten an ki piye biwo ”Caritas” nan vil Gonayiv la, yo ale ak prèske tout sa yo jwenn nan lokal la.
Gen lòt zonn menmsi pa gen dezòd, pa gen dechoukay ak manifestasyon, presizeman Ench, men pyès aktivite pa fonsyone, prèske tout enstitisyon fèmen, mache pa fonksyone, machin pa vwayaje ale nan lòt komin.
Malgre gen plizyè polisye ki t ap eseye retire barikad nan kèk kote ki te bloke, plizyè pwotestatè kontinye operasyon peyi lòk la nan plizyè vil, tankou Okap, tigwav epi Gonayiv. Yo toujou pwofite pou fè konnen, yo p ap janm bouke tout tan Ariel Henry pa rache manyòk li pou yo jwenn gaz pou yo ka fonksyone, konsa lavi chè va tanmen epi pwodui premye nesesite yo va desann pou pèp ayisyen an ka rale yon souf.
Atik sa se pwopriyete prive ©️ Gwoup Medya MAGHAITI 2022
