Aprè zak piyaj ladwàn nan Okap sibi, jounen jodi lendi 13 me 2024 la, yo akize plizyè kontrebandye sitou sa yo ki ta manm pati politik yo, selon sa a jounal Vant Bèf Info rapòte.
Rezon ki ta lakoz zak vyolans anndan ladwàn Okap la se paske enstitisyon an te sezi, vandredi 5 me ki sot pase a, yon konntenè zam pandan yo t ap fè kontwòl machandiz ki te sòti Etazini.
« Depi aprè yo te fin sezi zam ak minisyon nan Biwo ladwàn Okap la, tousuit yo fin dekouvri konntenè sa a, ajan kontwòl ladwàn yo ak ofisyèl yo te vin ap resevwa menas nan men moun yo pa te rive idantifye. Jodi a yo reyalize menas yo.», toujou selon sa a medya Vant Bèf Info fè konnen.
Biwo a te sezi yon gwo kagezon zam ak minisyon aprè enspeksyon yo, jan sa a toujou konn fèt, sou sa a k ap sòti nan peyi Etazini. Ajan yo te dekouvri 12 fizi; 14 pistolè 9milimèt; 999 katouch ki gen ladan l 638 kalib 2,56; 278 kalib 9mm; 52 kalib 7,62; 36 kalib 40 ak 34 chajè.
« Gason ak zam antre nan biwo a maten an, yo fè anpil vyolans, yo piye lokal nou yo epi yo mete dife nan baryè prensipal la », se sa a yon ofisyèl nan ladwàn nan vil Okap la revele VBI.
Pou fini, aprè zak malfra sa yo, direksyon jeneral ladwàn nan te voye yon komisyon pou ranfòse estrikti kontwòl biwo Okap la. Medya Vant Bèf Info kontinye pou l di : «Operasyon sa a se te pou chase ofisye ladwàn ki sòti Pòtoprens yo tou.»
Atik sa se pwopriyete prive © Gwoup Medya MAGHAITI 2024
