Nan lespwa pou tante sove lavi yo nan atak gwoup gang Kanaran ak Titanyen tanmen depi ayè mèkredi 19 avril 2023 a nan zòn Kabarè, plizyè abitan nan sous matla ak Simonèt mouri nan lanmè akòz ti kannòt yo te ye a te koule. Pami viktim yo ta gen anviwon 8 ti bebe ki peri, selon enfòmasyon pwofesè Chrisner Télusma bay sou Radyo Televizyon Karayib.
“Gen plizyè moun ak plizyè ti bebe ki t ap tante kite komin lan pou ale Leyogann, malerezman yo pa rive kote yo te vle rive a. Kannòt la fè nofraj, li koule, genyen ki sove men gen 8 a 9 ti bebe ki koule yo pa rive jwenn yo se sa bilan an ye pou moman an”, se sa responsab la deklare jodi jedi 20 avril 2023 a sou antènn Radyo Karayib nan jounal “Premye Okazyon“, pandan l prezise li poko gen enfòmasyon sou konbyen moun ki te sou kannòt sa a.
Poutan, pou jous maten an poko gen yon bilan ofisyèl sou konbyen moun ki ta viktim nan atak nèg ak zam fè sou popilasyon Sous matla a, men plizyè responsab nan zòn nan fè konnen gen plizyè moun ki mouri, ki blese, ak plizyè kay ki boule. Daprè enfòmasyon yo bay, jouskounya pa gen okenn entèvansyon lapolis e prezime bandi yo toujou antoure zòn nan.
“Pa t gen okenn entèvansyon ki te fèt, lapolis te tante, men yo enpuisan paske sa k ap fèt la depase lapolis, se yon kou pa konprann. Bandi asyeje Sous matla jouskaprezan moun yo anndan lakay yo. Gen direktè lekòl, pwofesè ki kache nan direksyon lekòl yo paske nan moman an te gen lekòl, e genyen pwofesè ki pran bal ki paka sòti”, daprè sa Télusma rakonte.
Nan divès eksplikasyon ki bay sou dosye sa, kèk moun ki gen fanmi ki viktim ak tout pwofesè Télusma fè konnen popilasyon an pyeje anndan lakay yo. Yo di gen nan yo ki mouri anba bal akòz yo paka jwenn swen, gen sila yo ki blese k ap soufri men malerezman pa gen okenn mwayen pou moun deyò ta antre pou pote yo sekou. Se menm jan an tou, sitiyasyon parèt difisil pou 4 medam yo site, ki nan yon kay kote gen youn ki mouri, ak yon lòt ki pran bal nan tete li.
Yon lòt bò, enfòmasyon ki disponib yo fè kwè gen anviwon 10 moun nan yon sèl fanmi ki mouri akòz bandi te antre al mete fen ak lavi yo. Konsa tou, gen anviwon yon dizèn jèn gason ki te kanpe dèyè barikad zòn yo ki tonbe.
Nan sans sa, responsab la ak moun zòn nan lanse yon SOS pou sila yo ki ta vle ede yo. Li te pwofite voye yon mesaj klè pou Premye minis Ariel Henry, Frantz Elbé ak tout rès gouvènman an kote l di yo si yo pa ka rezoud sa k ap pase nan peyi a, se pou yo di sa epi bay moun ki ka ranpli misyon sa plas la.
N ap raple nan atak sa ki te fèt ayè mèkredi a, plizyè nèg ak zam t ap eseye atake prizon sivil Kabarè a. Nan sans sa yon polisye ki rele Jude Guillaume, ki sòti nan 26yèm pwomosyon te rive blese ak bal.
Atik sa se pwopriyete prive ©️ Gwoup Medya MAGHAITI 2023
