Nan yon dokiman 8 paj ki pote non “Fiducia Supplicans” li siyen ayè lendi 18 desanm 2023 a, Pap François mete l dakò pou tout pè katolik yo beni maryaj masisi ak madivin nan mond la. Selon dokiman sa, moun sa yo ap jwenn benediksyon an se vre, men ak kondisyon sa pap fèt jan rityèl legliz katolik la konn fèt la.
“Li posib pou beni koup ki pa regilye yo ak koup ki gen menm sèks yo, se ap sou yon fòm men se pa rityèl otorite eklesyastik yo konn fè yo, paske nou pap kite rityèl nou ak priyè nou yo fè gen konfizyon ant sa ki fè maryaj la ak sa ki kontrè ak li. Konsa, n ap evite rekonèt oubyen rele maryaj sa ki pa sa vre“, daprè sa ki ekri nan dokiman an divès medya entènasyonal rapòte.
Malgre li dakò siyen pou otorite nan legliz katolik beni maryaj moun ki gen menm sèks yo, dokiman sa kadinal Victor Manuel Hernandez ekri a presize benediksyon y ap pale a pa dwe fèt menm jan ak pa 2 moun sèks diferan. Sa vle di, pawòl sa yo pa dwe di an menm tan nan seremoni an, li pa dwe itilize ni rad ni jès ki konn abitye fèt nan bon maryaj.
Paske menm si desizyon sa pran konsa, Vatican News soulinye sa pa vle di yo dakò ofisyèlman ak jan moun menm sèks yo ye a ni sa pap korije anyen nan ansèyman perenn legliz sou kesyon maryaj. Puiske yo estime sakreman maryaj yo a ap toujou la pou sèlman koup ki gen sèks diferan. Sepandan, yo di konsa avèk desizyon sa yo vle evite pran nan pyèj benedikyon an dwe vini nan yon sèl sans la.
N ap fè konnen, Vatikan li menm ki se kote moun katolik yo chita menm te raple tout moun nan lane 2021, omoseksyalite se tankou yon peche. E yo te menm asire li ap toujou enposib pou moun ki nan kominote LGBTQ yo resevwa sakreman maryaj.
Atik sa se pwopriyete prive ©️ Gwoup Medya MAGHAITI 2023
