Sòti dimanch 17 desanm nan rive jodi madi 19 desanm 2023 a, plizyè abitan nan komin Gantye fè konnen gwoup gang 400 Mawozo pran kontwòl zòn bouk nan komin Gantye. Konsa, pou sèlman 3 jou sa yo abitan yo fè kwè gen plizyè moun endividi yo touye, sa yo mete dife sou yo ak sila yo yo fè vyolans fizik sou yo.
Menm jan endividi ak zam pran kontwòl epi ap opere nan Maryani depi mwa novanm pase a, jounen jodi a se konsa tou komin Gantye twouve l anba men gwoup gang ak zam ki vle enpoze yo ladan l. Fas ak sitiyasyon sa, abitan yo pa sispann lanse SOS pou Wo kòmandman lapolis la malgre ta gen polisye ak moun k ap fè brigad pou fè fas kare ak nèg sa yo.
Pou kounya poko gen yon bilan ofisyèl, men selon divès sous, ak plizyè mesaj alèt ki ap pataje sou rezo sosyo yo ta gen anpil moun ki gentan viktim nan atak sila.
“Gen yon dam ak yon timoun yo boule tou vivan, gen moun yo kwaze ak yo se rache yo rache yo ak manchèt, maten an la se kay k ap boule. Depi dimanch yo pran zòn nan an otaj, bilan yo ap lou anpil sitou lè n konsidere tout bagay sa yo“, se sa yon abitan nan Gantye deklare nan jounal Premye Okazyon sou Radyo Tele Karayib jodi madi a, kote l fè konprann tout maten an sitiyasyon an pa chanje okontrè moun yo oblije ap kouri kite zòn nan yon fason pou yo pa viktim anba men prezime bandi yo.
Fonparizyen, Fonvèrèt, Tyòt, Ansapit, Benè, Bèlans se pami kèk vil nan depatman Lwès ak Sidès ki menase si toutfwa komin Gantye ta pèdi tout bon vre. Konsa sa tou, pandan sitwayen yo ap mande Leta ak Wo kòmandman lapolis la èd la, yo avèti si pa gen okenn entèvansyon ki fèt bò kote responsab yo li posib pou nou ta rive pèdi dwàn ak imigrasyon ki chita kò l nan zòn Malpas la, yon pòs kontwòl ki nan Gantye epi plizyè komisarya ki nan divès zòn nou sot site yo.
N ap soulinye jou ki te 14 fevriye 2023 a, yon gwoup endividi ak zam te atake komin nan pou yon premye fwa, kote yo te kidnape 3 moun, epi te pwofite boule kay kèk moun nan zòn nan.
Atik sa se pwopriyete prive ©️ Gwoup Medya MAGHAITI 2023
