Si meriken yo kenbe yon moun k ap eseye travèse fontyè Etazini-Meksik la, y ap depòte li lapoula

Gouvènman ameriken an vini ak yon pwogram pou li ka frennen fason migran yo ap antre nan peyi Etazini pandan plizyè lane. Desizyon sa pral pèmèt moun ki soti nan peyi tankou Ayiti, Kiba, Nikaragwa epi Venezyela jwenn posibilite pou antre nan peyi a legalman, san yo pa bezwen pase sou fwontyè. Nan yon entèvyou li te bay radyo Magik 9 jodi a, Aktivis Guerline Joseph te pote plis presizyon.

Selon aktivis Bridge Alliance lan Guerline Joseph :« Moun ki eseye antre nan peyi Etazini nan fason iregilye, moun sa y ap kenbe yo epi y ap retounen yo nan peyi Meksik. Paske, gouvènman Meksik pare pou li resevwa imigran nan 4 peyi sa yo: Ayiti, Kiba, Nikaragwa epi Venezyela.»

Depi kèk tan anpil Ayisyen chwazi kite Chili, Brezil pou travèse Meksik nan lide pou yo ka franchi Etazini, sa k ap bay yo posibilite pou yo jwenn yon pi bon kondisyon miyò. Pandanstan, gouvènman Joe Biden lan pran yon nouvo desizyon pou li kwape vag migrasyon sa. « Y ap bati yon nouvo pwogram 30 mil moun avèk Ayiti, Nikaragwa, Kiba epi Venezuela, posibilite pou yo aplike nan pwogram sa si tout fwa yo gen yon moun pwòch ki deside esponzorize epi ki kapab fè aplikasyon pou yo kapab antre w nan etazini » sa se deklarasyon aktivis Guerline Joseph.

Selon aktivis la, pèsonn Ayisyen avèk lòt peyi ki konsène yo pa dwe tante antre nan peyi Etazini nan fason iregilye kounya. Si sa fèt y ap depòte yo nan peyi a osnon kenbe yo Meksik, kidonk li ta konseye pou yo aplike pandan yo nan peyi yo a « Si yo pa deja Meksik pa kouri vin antre, paske y ap siveye bagay yo. Pito n rete aplike nan pwogram sa » selon aktivis Guerline Joseph.

« Pandan tan sa, n ap kontinye batay pou n kapab mete sou pye kèk pwogram pou mande kominote Etazini pou lòt vwazen vin garan kèk Ayisyen oubyen esponzorize yo » daprè deklarasyon Guerline Joseph sou koze sa.

AP Photo/Felix Marquez

Atik sa se pwopriyete prive ©️ Gwoup Medya MAGHAITI 2023

Comments

commentaires