Alòske peyi a nan gwo kriz imanitè kote vyolans gang yo pa sispann limite aksyon lopital yo, OCHA revele jodi madi 25 mas 2024 la pou moman an se sèlman 3 lopital nan rejyon metwopolitèn nan ki ap fonksyone. Malgre sa a, òganis Nasyonzini an fè konnen lopital sa yo nan gwo difikilte pou kontinye bay popilasyon an sèvis nesesè yo.
“Egzèsis sa a pèmèt nou gen imaj klè sou estrikti sante ki toujou ap fonksyone yo e ki gen bezwen ijan. Nan rejyon metwopolitèn nan, Lopital Lapè, lopital Ti Plas Cazo, ak lopital Elizer Germain ki kontinye ap bay yon ti kras sèvis swen nan kesyon akouchman an ijans“, selon evalyasyon Fon Nasyonzini pou Popilasyon an, FNUAP.
Pandantan OCHA anonse Sant Anbilansye Nasyonal relouvri depi ayè lendi 25 mas 2024 la, aprè yo te pran desizyon pou fèmen pòtay yo 21 mas pase a akòz ensekirite a. Sepandan, malgre yo louvri yo fè konnen li vin pi difisil pou bay materyèl medikal kote k ap fonksyone yo pou goumen kont kolera e kontinye aktivite medikal yo menmsi pou moman an sèvis yo ap ralanti pi plis puiske yo paka distribiye materyèl nesesè yo.
“Sant Anbilansye Nasyonal ki te blije femen 21 mas la akòz aktivite gang yo nan rejyon an louvri 25 mas la, epi transfere kèk Anbilans nan lopital Lapè a”, daprè sa Biwo Kòdinasyon Zafè imanitè Nasyonzini (OCHA) a fè konnen pandan yo anonse tou akòz difikilte yo nan jou k ap vini yo li posib pou Ayiti fè fas ak gwo difikilte pou moun jwenn materyèl sante yo sitou nan peryòd epidemi yo.
Yon lòt bò, nan sa ki gen pou wè ak vyolans sou jan (VBG) yo fè konnen pou 2 premye mwa ane 2024 la, yo jwenn gen 250 ka, yo soulinye 68% nan moun ki sibi yo se nan deplase entèn yo yo ye. Poutan, pa rapò ak chif sa se sèlman 3% ladan yo ki trete nan 72è tan aprè vyolans la, tout sa yo responsab yo mansyone se konsekans sikilasyon medikaman yo ki manke fèt nan peyi a.
N ap raple, òganizasyon entènasyonal la resanse nan 2 jou omwen 10 ka sispèk kolera nan sant refijye ki nan Lise Nasyonal Marie Jeanne nan.
© Tous droits réservés – Groupe Média MAGHAITI 2024
