Daprè sa a yon responsab ameriken deklare bay medya Miami Herald, jodi mèkredi 22 me 2024 la, li pwobab pou yo rekile dat deplwayman sòlda kenyan yo k ap vin okipe tèt misyon miltinasyonal sekirite an Ayiti a akoz manke kèk materyèl.
«Sòlda Kenyan yo k ap gen pou dirije misyon sa a k ap gen 2500 sòlda te mete yo dakò ak gouvènman ayisyen an sou règ angajman pèsonèl sekirite a, sa a ki pral kapab penmèt yo fè fas ak gwoup gang byen ekipe yo ki gentan okipe peyi d Ayiti anba je Lapolis la». Sa se deklarasyon Mc Clatchy te fè bay Miami Herald.
Toujou selon responsab ameriken an, yon reta nan achte machin blennde ak elikoptè ki byen ekipe pou evakyasyon medikal kapab fè yo repouse deplwayman an pou mwa jen. Misyon an dwe gen ekipman, achte elikoptè pou transpòte blese, puiske gen yon dizèn Lopital ki detwi ak piye depi nan dat 29 fevriye ki sot pase a, nan moman gang yo te mete ansanm pou ranvèse gouvènman an.
Paralèman, delegasyon 6 manm Kenya yo ki te vin lendi 20 me ki sot pase a te gentan konstate manke materyèl pou resevwa deplwayman polisye yo. N ap raple, sòlda kenyan yo ta dwe vini pandan prezidan Ruto ap gen pou vizite Etazini.
«Nou vle pale sou koze machin, zam epi lòt bagay ankò, yo gen bezwen anvan yo deplase», selon sa a asistans Kongrè a ajoute, Li kontinye pou l di «Tout sa a pa te gentan fèt puiske plizyè nan eleman sa yo te rasanble yon kote diferan.»
Pou fini, n ap soulinye Leslie Voltaire ki se manm konsèy prezidansyèl Tranzisyon an fè konnen sou radyo France 24, jodi 22 me a, sòlda miltinasyonal yo pa pral gen pou goumen avèk bandi yo. Yo pral la pou veye enstitisyon piblik yo ak akonpanye Lapolis nan travay yo.
Atik sa se pwopriyete prive ©️ Gwoup Medya MAGHAITI 2024
