Atravè yon nòt ekspè yo pibliye nan dat ki te lendi 6 me 2024 la, plizyè ekspè nan Nasyonzini konstate gen anpil vyolans k ap fèt sou fanm ak ti fi. Vyolans sa yo vale teren akoz pwoblèm ensekirite peyi a ap konfwonte, sa a ki ta vle menm antere dwa fizik, mantal ansanm ak lavi moun sa yo.
«Fanm ak ti fi an Ayiti yo kontinye ap sibi yon fason san parèy konsekans kriz sa a k ap ravaje peyi a», se sa a ekspè nan Nasyonzini yo fè konnen. Yo Kontinye pou yo di : « Inegalite yo te deja la anvan sa a, diskriminasyon seksis vin pi grav sitou nan sitiyasyon aktyèl la.»
Yo di yo gen anpil preyokipasyon konsènan gang kriminèl yo k ap itilize vyolans seksyèl kont fanm ak ti fi kòm zouti pou yo ta fè lapè epi mande lajan pandan lide yo se pran kontwòl pouvwa a epi sanksyone moun yo nan kominote yo.
«Fanm ak ti fi ki deplase ale nan sit yo anndan peyi a ap viv nan yon sitiyasyon ki pa nòmal ak enstab, yo nan sitiyasyon vilnerab avèk vyolans seksyèl», daprè sa a ekspè Onizyen yo sinyale nan nòt sa a.
Ekspè yo desire mande kriminèl yo pou yo kanpe tout fòm vyolans seksis y ap fè rapid vit. Yo menm eksprime enkyetid yo fas ak enkapasite grav ak pèsistan otorite yo pou pwoteje ak fè respekte dwa moun sa yo nan sitiyasyon kriz peyi a ap travèse a.
«Okenn moun pa dwe anpeche ni gen difikilte pou l chwazi bezwen l yo epi ofri fanmi l yo sa a tankou gen aksè ak lekòl, swen sante epi sèvis ki pi ba yo ansanm ak bonjan swen pou yo fè timoun ak fè sèks», se sa a ekspè yo ajoute nan etid yo mennen sou Ayiti.
Pou fini, yo leve vwa yo pou fè konprann refleksyon sou vyolans seksyèl k ap fèt sou fanm ak ti fi anndan peyi a dwe nan sant pwosesis tranzisyon politik la. Pou yo, Konsèy Prezidansyèl Tranzisyon an dwe garanti vyolans sou fanm ak ti fi p ap repwodui, yo dwe mete anba kòd tout koupab yo pou y al jije devan lajistis.
«Nou mande tout otorite yo pou pran tout mezi ki nesesè yo pou garanti patisipasyon fanm yo nan egalite youn pou lòt nan pwosesis konsolidasyon lapè, lè n konsidere rezolisyon 1325 nan konsèy sekirite Nasyonzini an.»
Crédit Photo: Médecin Sans Frontières
Atik sa se pwopriyete prive © Gwoup Medya MAGHAITI 2024
