Se yon polisye ki lakoz lanmò Jounalis Romelson Vilcin daprè yon enkèt IGPNH

Aprè Enspeksyon Jeneral Polis Nasyonal Dayiti (IGPNH) a te tanmen yon enkèt sou lanmò jounalis Romelson Vilcin mwa oktòb pase a, yo fè konnen se yon polisye ki te konplis nan lanmò travayè laprès la.

Nan yon korespondans Enspeksyon Jeneral Polis Nasyonal la voye bay Asosiyasyon Nasyonal Medya Ayisyen (ANMH) yo, yo di se te yon polisye ki te lakòz lanmò jounalis Romelson Vilcin nan lakou komisarya dèlma 33 a, jou ki te 30 oktòb 2022 a.

Menm jan anpil nan jounalis ki te douvan komisarya dèlma 33 a jou dimanch 30 oktòb sa te temwanye l, se ta prèske menm konklizyon an rezilta ankèt IGPNH la jwenn nan sa ki gen pou wè ak lanmò korespondan radyo jenerasyon 80 an.

Enstitisyon an montre klè nan nòt sila se yon ajan ki te komèt zak la.
“Enkèt nou fè a mennen nou pou n konkli se move konpòtman polisye a ki lakòz“, se sa yo fè konnen pandan yo pa bay pyès detay sou idantite polisye a.

Nan menm sans sa, yo te tou pwofite fè konnen yo deja kominike bon jan mezi sanksyon pou enstans ki la pou sa a ta aplike kont polisye sa a. Nan menm kad dosye a, yo anonse tou y ap mete disponib desizyon final la nan kèk tan ankò.

N ap raple sikonstans ki te mennen lanmò jounalis la se te aprè lapolis te arete jounalis Robeste Dimanche, aksyon ki ta pral pote endiyasyon bò kote lòt jounalis yo, ki te deside al proteste douvan komisarya dèlma 33 a.

Atik sa se pwopriyete prive ©️ Gwoup Medya MAGHAITI 2023

Comments

commentaires