Jounen jodi vandredi 2 septanm 2022 a, ansyen palmantè Youri Latortue te di kèk bagay sou Pati Piti Desalin atravè yon entèvyou li te ofri sou Radyo Magik 9, epi pataje kèk enfòmasyon sou detounman chèk nan ribrik entèlijans ki anndan Ministè Enteryè a.
Selon lidè manm Pati Ayiti An Aksyon (AAA), Youri Latortue deklare Ministè Enteryè se sou responsabilite Pati Pitit Desalin li ye : ” Premye bagay pou w konnen sou kesyon gouvènman an, se nan yon reyinyon nou te ye avèk DIRPODE ak Premye minis Ariel Henry, anplis Senatè Beauzile, Sorel, André Michel, elatriye. Premye minis lan te di nou, Minis Enteryè se pou Pitit Desalin li ye, kote li te remèt nou yon papye. M pa kwè m ka nan voye wòch kache men, nomanklati gouvènman an la epi yo te mete non pati ki atribye ak chak fonksyon, sa m toujou kenbe an Achiv”, toujou selon menm medya a.
Ansyen palmantè ak Presidan chanm sena a, Youri Latortue te kontinye pou li ajoute :” Dezyèm bagay pou nou konnen gen moun anndan gouvènman an, André Michel te di ki toujou ap rele Ariel Henry pou yo di l, yo pral fè yon ti manifestasyon, se pa gwo bagay. kite yo fè li”.
Pandanstan, Lidè Pitit Desalin Moïse Jean Charles, toujou voye jete byen lwen tout akizasyon ki ta vle fè kwè pati l ap dirije a fè pati gouvènman sa, kòmkwa Ministè Enteryè se li ki ta mete Lizt Quitel nan tèt li. Lidè Pitit Desalin lan te pote yon demanti fòmèl kont tout moun k ap di sa, yon klarifikasyon li te fè anvan manifestasyon 22 Dawout 2022, nan Jounal Premye Okazyon.
Senatè Youri Latortue te kontinye pou li avanse : “Trazyèm bagay gen yon eleman entèlijans ki se yon ribrik, gen anpil dekesman ki fèt nan mwa Jiyè a. Nou tout te konnen nan ki rejyon jewografik yo te ale. Anvan 22 Dawout la, chèk ki te chanje nan yon semenn avan sa yo se chèk ankachèt ki pa te ale ditou nan ribrik entèlijans lan”.
Batay kont Koripsyon ULCC ak òganizasyon dwa moun yo ap mennen nan administrasyon piblik la pa dwe sispann, koz gen anpil Sila k ap itilize lajan piblik pou yo manifeste nan lide pou kenbe yon minis an fonksyon kòm yon chapèl nan objektif pou yo prepare eleksyon yo.
Atik sa se pwopriyete prive ©️ Gwoup Medya MAGHAITI 2022.
