Bandi ak zam touye ak plizyè bal pwofesè nan inivèsite Leta a, Solon Fortunat ayè jedi 7 septanm 2023 a, nan zòn kafou Peyan. Selon enfòmasyon yo, polisye Willio Idocci ta li menm tou pèdi lavi l. Lanmò 2 sitwayen sa yo rive pandan gwoup ame zòn Bèlè ap tante pran kontwòl katye Solino, kote yo deja boule plizyè kay, daprè plizyè imaj k ap sikile sou reso sosyal yo.
Enjenyè, pwofesè matematik ak fizik nan Lekòl Nasyonal Siperyè (ENS), ak nan Fakilte Syans yo (FDS), Solon Fortunat rive viktim ayè jedi a, anba plizyè bal nèg ak zam Bèlè yo. Selon plizyè etidyan viktim nan, se te yon moun ki te pase tout lavi l nan ansèyman, ki te chaje ak sajès.
“Mèt Fortunat te yon bon pwofesè, Yon nonm saj, yon nonm ki te gen bon kè”
“Pou initil yo se yon moun san valè, men pou etidyan l yo se yon gran save matematisyen epi fizisyen san parèy. Mwen kenbe bon souvni m ak pwofesè m nan“, se kèk nan temwanyaj ansyen etidyan pwofesè Fortuna.
Yon lòt kote, nan menm kad atak gwoup gang Bèlè a ap fè nan zòn Solino, polisye Willio Idocci jwenn lanmò l tou nan lannuit jedi 7 septanm nan, aprè l finn resevwa yon bal. Selon enfòmasyon yo, polisye a te sòti nan 17yèm pwomosyon lapolis la.
N ap raple se depi mèkredi 6 septanm nan bandi ak zam tanmen aksyon vyolans sou plizyè zòn, pami yo Solino, Dèlma 24, Nazon, Tomazo, kote yon sitwayen ki pote non Rodney Avril pèdi lavi l. Pandantan sa, abitan zòn Nazon ak kèk zòn sou kote yo mete plizyè barikad nan wout yo yon fason pou pwoteje popilasyon yo a kont yon nouvo atak nèg ak zam ta panse fè yo.
Atik sa se pwopriyete prive ©️ Gwoup Medya MAGHAITI 2023
