Nan somè Ibewo-Ameriken an ki te fèt yè samdi 25 mas 2023 a, prezidan Repiblik Dominiken an Luis Abinader mande kominote entènasyonal la mete lapè nan peyi Dayiti.
Nan 18èm somè Ibewo-Ameriken ki òganize nan peyi Repiblik Dominiken, prezidan Dominiken an devan plizyè lòt chèf deta, presizeman nan Amerik latin ak Ewop la, te avanse pou l di :
«Sèl fason pou nou aji avèk Ayiti, se mete lapè. Si nou vle ede li, nou dwe ale mete lapè, se pa nan pale diskou, men pito aji».
Se chak jou sitiyasyon an ap dejenere, kote plis moun ap vin pòv epi mouri ap kouri al viv lòtbò dlo, ki fè sila yo ki rich y al viv Etazini ak Sendomeng, toujou selon sa Abinader fè konprann.
«Nou paka kite sitiyasyon ap kontinye konsa an Ayiti, paske se plis sila yo ki pòv k ap soufri alòske sak gen mwayen y ap viv deyò peyi a», pawòl prezidan Repiblik Dominiken an.
Gen plis pase 70% kriminèl k ap kontwole teritwa Pòtoprens lan, Abinader di nou paka inyore sa k ap pase an Ayiti an.
«Li mande pou Nasyonzini pote yon repons rapid, mete Ayiti sou kontwòl li epi metrize vyolans ki egziste nan peyi Dayiti a».
Sou lòtbò a, prezidan Kostarika a te pran lapawòl pou li te pale sou Ayiti :
«Fòk nou touye dife olye n mande kòman n pral rekonstrui kay yo. Se pa inyore ni fèmen je sou li. Nou sou menm zile jounen jodia, gen yon leta ki vle detrui akoz vyolans. Men, nou nan monn lan, nou paka nan mande si pou n voye yon fòs Lame vin ede Ayiti, se responsabilite mondyal», selon Prezidan Rodrigo Galves Robles.
N ap raple Justin Trudeau ayè vandredi 24 mas la, anonse peyi Kanada pral debloke anviwon 100 milyon dola pou Ayiti, nan objektif pou ranfòse gouvènman Ayisyen an epi fòme Polis Nasyonal Dayiti an.
Atik sa se pwopriyete prive ©️ Gwoup Medya MAGHAITI 2023
