Jean-Dickens Toussaint ak madanm li Abigail Toussaint se non 2 sitwayen ameriken sa yo prezime bandi te rive kidnape ak yon zanmi fanmi an sa gen yon semèn pandan yo te nan yon bis. Ravisè yo mande 200 000 dola vèt mete sou 6 000 dola fanmi an te gentan bay pou liberasyon sitwayen ameriken yo, selon ABC News.
Koup sa te nan peyi a se nan lide pou te al wè pwòch yo ki malad epi ale nan yon festival, sa yo ki pa t rive fèt akòz bandi ak zam te rive mete men sou fanmi sa 18 mas pase a pandan yo te nan yon bis ki t ap sòti Pòtoprens, daprè sa jounal ameriken an rapòte san bay lòt detay sou zanmi sa ki te ak koup sila a, e ki li menm tou nan men ravisè yo.
Nikese Toussaint, ki se sè Jean Dickens fè konnen kidnapè yo te mande 6000 dola ameriken nan yon premye tan pou te libere 2 moun yo. Men daprè sa l soulinye, malgre fanmi an te bay lajan sa yo te egzije yo a jouskounya yo pa lage yo men pito mete sou lajan an kote yo mande 200 000 dola vèt pou yo chak nan moman an.
“Lè n finn voye lajan an pri a vinn monte a 200 000 dola pou yo chak, e nou pa gen kalte lajan sa”, selon deklarasyon Nikese.
Yon lòt bò, li fè konnen fanmi an te kontakte ni anbasad Etazini nan peyi a, ni depatman sekirite enteryè ameriken an sou dosye sila. Poutan, jan fanmi Toussaint an panse se kidnape yo kidnape koup la se pa konsa responsab ameriken yo wè l.
“Lè yon sitwayen ameriken disparèt, nou travay nan tèt kole ak otorite lokal yo pandan y ap fè rechèch sou sa, e n ap pataje enfòmasyon ak fanmi yo jan nou kapab“, selon yon kominike depatman an te mete deyò pou sikonstans lan.
Pou kounya, tout fanmi an ki pale ak laprès ameriken eksprime gwo enkyetid konsènan lavi 2 pwòch yo sa yo ki nan men prezime bandi. Tout sa yo vle nan moman an, selon sa yo di, se jwenn yon prèv pou ta konn si Jean Dickens ak Abigail toujou an vi.
Atik sa se pwopriyete prive ©️ Gwoup Medya MAGHAITI 2023
