Menm jan sa te anonse pandan semèn nan, prezidan Luis Abinader anonse jodi jedi 14 septanm nan, l ap fèmen tout fwontyè ayisyano-dominiken yo vandredi sa depi l fè 6è nan maten, selon Listín Diario. Desizyon sa pran pandan gen yon delegasyon ayisyen nan peyi vwazen an ki al chache jwenn yon solisyon sou kesyon konstriksyon kannal nan rivyè masak la sou bò Ayiti a.
“Vandredi depi 6è nan maten tout fwontyè Repiblik Dominikèn yo, tankou tèrès, maritim, anlè ap fèmen. Ministè defans la kanpe, marin ak tout lame anlè yo pare pou nouvo dispozisyon sila a“, se sa prezidan dominiken an deklare nan yon videyo jounal Listín Diario pibliye jodi jedi a menm.
Yon lòt kote, chèf gouvènman dominiken an di menm si diskisyon ak gouvènman ayisyen an ap kontinye jodi jedi a, yo menm y ap pran desizyon ki bon pou sekirite nasyonal yo a.
Se sa k fè Luis Abinader soulinye “poukont pa yo otorite ayisyen yo gen pwoblèm pou kontwole pwòp teritwa yo konsa, si gen bagay yo paka jere se menm jan an yo ka paka kontwole dosye sa. Men, sa pap pase konsa pou gouvènman dominiken an“, toujou daprè sa nimewo 1 Repiblik Dominikèn nan fè konnen nan baz militè yo a kote l t al remèt kèk ekipman pou sòlda yo.
Pou sa k gen pou wè ak lòt desizyon yo, jounal la mansyone prezidan Luis Abinader bay lòd pou Direksyon Jeneral Migrasyon entèdi 9 pèsonalite ayisyen antre nan peyi yo a. Selon yo menm, moun sa yo se ta yo menm ki dèyè kriz sa 2 peyi karayib la ap viv nan moman an, men jounal la pa bay plis detay sou idantite moun sa yo.
Pou kounya, okenn enfòmasyon pa bay pou ta konnen ki solisyon 2 gouvènman yo jwenn sou dosye rivyè masak la, men jouskounya dominiken yo fè kwè diskisyon yo ap kontinye jodi a. Pandantan sa, popilasyon nan vil Wanament la di yo pap pran nan presyon, paske y ap kontinye konstui kannal la pou yo ka wouze plèn Maribawou a.
Atik sa se pwopriyete prive ©️ Gwoup Medya MAGHAITI 2023
