Depi aprè bandi ak zam te fin kraze Penitansye Nasyonal la nan dat 3 mas 2024 la, nan zòn Metwopolitèn Pòtoprens la, gwoup gang Viv ansanm pa sispann teworize, dechèpiye epi mete dife nan byen prive ak piblik nan Repiblik la. Lekòl, inivèsite, lopital, famasi, bibliyotèk, youn pa epanye anba men yo. Sa ki fè pral gen gwo konsekans ak enpak nan sosyete a, sitou nan sektè sanitè a selon espesyalis yo.
“Lè nou konsidere divès zak piyaj ki fèt sou ajans klinik ak famasi yo, sa vrèman pral gen enpak sou sektè sante a nan peyi a“, se deklarasyon prezidan Asosyasyon Famasi an Ayiti a(APH) Pierre Hugues Saint Jean, fè bay Mag Haïti.
Depi monte vyolans la nan peyi a gen anviwon 5 lopital ak divès famasi ki touche anba zak banditis nan zòn Metwopolitèn Pòtoprens la. Pami yo nou jwenn Lopital «Saint François de Sales », Lopital Inivèsite Leta Dayiti tout moun konnen sou non Lopital Jeneral, Lopital Dèlma 18, lopital Bernard Mevs(ki fèmen), Lopital «Fontaine » nan site Solèy. Anplis sa yo, gen plizyè famasi yo piye epi boule nan ri Monsenyè Giyou ak anfas Lopital Jeneral.
Pou prezidan APH la sitiyasyon sa: «pral ogmante sou mank medikaman ki te deja genyen nan sektè famasi a, sitou akoz pò ki fèmen epi difikilte pou achte medikaman. Sa ki pral mete medsen ak pasyan yo nan difikilte pou pèmèt yo fè kèk tretman».
Sou yon lòt bò, depi kèk jou bandi ak zam rive pran kontwòl pi gwo sant laswenyay peyi a ki se Lopital Jeneral. kote yo tabli katye jeneral yo pou itilize l kòm pwen estratejik pou afwonte Lapolis k ap anpeche yo bout ak move zak yo. Nan sans sa Pierre Hugues nan sousi pou montre sistèm sante te deja pa bon, fè konnen ak aksyon sa yo egzistans moun pral menase plis toujou, sitou pasyan ki malad yo, daprè sa l di.
Pandantan sa, menm jan divès gwo estrikti ap sibi zak piyaj yo se konsa tou plizyè pwopriyetè klinik ak famasi lage 2 bwa balanse jounen jodi a.
Tankou manm popilasyon an swete l, prezidan Asosyasyon Famasi a Pierre Hugues Saint Jean espere pou n pote kole pou rezoud pwoblèm peyi a nan fason n kapab. Puiske li rete kwè ” si tout fwa nou menm Ayisyen mete tèt ansanm, sa ap pi bon fòmil pou pèmèt peyi a jwenn estabilite li ak chimen devlopman dirab”.
© Tous droits réservés – Groupe Média MAGHAITI 2024
