Alòske bandi Savyen yo ansasinen 2 avoka mèkredi pase a, nèg ak zam nan lakou Pòtoprens kontinye ap simen latwoublay kote yo rive kidnape meteyowològ Rudy Victor depi ayè jedi 4 avril 2024 la. Selon jounalis Wendel Théodore, ravisè yo te kidnape madanm espesyalis la tou men pa t pran tan pou te lage l li menm.
“Yo lage madanm li kèk èdtan aprè, men ravisè yo mande yo gwo lajan kont liberasyon meteyowològ la“, se sa profesyonèl nan laprès ekri sou kont X (Twitter) li jodi a menm.
Yon lòt kote, pwòch kolaboratè Victor yo montre yo kont zak kidnapin sa ki fèt sou espesyalis la. Se sa ki fè, yo fè deklarasyon sa sou paj Fesbouk ki pote SOS Haïti-Météo pandan yo mande liberasyon viktim nan san kondisyon.
“Nou menm meteyowològ nou pa nan politik e nou pa politisyen tou, nou pa jounalis politik, se move tan nou konn pale ak lòt nouvèl ki gen rapò ak klima. N ap mande liberasyon Rudy Victor( Mr Météo ou Rudy Météo prese prese“.
© Tous droits réservés – Groupe Média MAGHAITI 2024
